Зенд
Республикадин Кьил Сергей Меликова Халкьдин Собранидиз кIелай Чарче ихьтин фикир авай: «Чи душманар Россияда миллетрин ва динрин арада адават тваз алахъзава. Международный алакъаяр къизгъин хьанвай къенин вахтунда миллетринни динрин арада дуствал хуьн иллаки важиблу я».
2023-йисан майдиз миллетрин арада алакъайриз талукь Советдин заседанидал уьлкведин Президентди кьетIендаказ къейднай хьи, къецепатай аксивили, миллетар, динар сад авуналди, Россиядин халкьарин тупламишвал анжах мягькемарзава.
Москвадин патав «Крокус-Сити» дараматда хьайи мурдарвилин терактди вирибурун рикIер къарсурнай. И гьерекатар авур вагьшияр къецепатан махсус къуллугъри интернетдин куьмекдалди желбнавайдакай СМИ-рин такьатра малумарнай. Мягьтел жедай кар ам я хьи, аялвиляй акъатнавайбур, мефтIеди кIвалахна кIанзавайбур, гьалдарзавайбуру са гьихьтин ятIани пулар, къулайвилер хиве кьуналди, гьасятда абурун чIалахъ жезва. Гьасятда чеб кьенерар масадан гъилера авай ламариз элкъуьрзава. Инсансузвилин, къанунсузвилин кардиз рехъ гайидалай кьулухъ абуру чеб терг авунин, чпиз кIеви жаза гунин месэладикай фикир тавун тажуб жедай делил я.
Ачухдаказ, рагъ алай юкъуз, кьуд пата видеокамераярни авайди чиз, гъиле яракь кьуна, ислягь инсанар кьиникь?… Идалай кьулухъ ахпа чеб еке пуларин иесияр жедайдакай, азадвиле, кеф-кефиятдик кваз яшамиш хьуникай фикирун… Им бес акьалтIай кIамашвал тушни!
Эхиримжи йисара Дагъустанда секин гьалар авайди тир, яни террориствилинни экстремиствилин чIуру гьерекатар хъхьанвачир. ЯтIани, агьалийри, талукь органри, гьукумдин векилри уяхвал садрани квадарна кIанзавачир. Алатай йисан октябрдиз Дагъустандин аэропортуна хьайи агьвалатрини успатна хьи, са гьихьтин ятIани тапан хабаррин, къецепатай кискис гунин нетижада Дагъларин уьлкведа гьалар пайгарсузбур ийиз алахънай.
С. Меликован Чарче къейднавай: «Экстремизмдинни терроризмдин идеологиядихъ галаз женг чIугун Дагъустанда кар алай месэла яз ама».
Гьайиф хьи, 23-июндиз къадим Дербентда ва Махачкъалада хьайи терактар икьван чIавалди хьайи вагьшивилин гьерекатрилай тафаватлу хьана. Тафаватлувал ам я хьи, террористриз чпи чеб цIуз вегьезвайди якъин тир. Гуьгъуьнлай малум хьайивал, абур яшайишдин жигьетдай дарда авайбурни тушир, яни пул патал къучивал авурбур я лугьуз жедачир. Бес вуч тир абурун макьсад? Вучиз бязибур чIуру идеологиядин менгенайра гьатзава? Вагьшийриз элкъвезвайбурни бес амайбурухъ галаз мектебра cанал кIелайбур, чеб хьтин таяр-туьшерихъ галаз хьайибур тушни? И суалриз гьарда вичин жуьреда жавабар гузва.
Динрин векилрини, гьа жергедай яз Дагъустандин Муфтиятдини ихьтин вагьшивилин гьерекатар меземмет ийизва. Пешекарри къейдзавайвал, исламда маса инсандиз зарар це лугьузвач. Акси яз, ислягьвал, адалатлувал герек я. Бес адалатдин чкадал адават хкязавайбурун кьадар тIимиларун патал вуч авун лазим я? Важиблуди гьа и месэла я. И жигьетдай махсус органри, къайдаяр хуьзвайбуру, хатасузвал таъминарзавайбуру — вири къурулушри кьетIи серенжемар кьабулун, шак физвай гьар са кас, чка, хабар вахтунда ахтармишун герек я.
Россиядин ватанперес, инсанперес чIехи халкь гьамиша анжах адалатдин, ислягьвилин терефдарар я. Чи уьлкведин душманриз, терроризмдиз — лянет!
Лезги Фетгьуьллагь
