Алатай базардин йикъара Дагъустан Республикадин милли политикадин министрдин везифаяр вахтуналди тамамарзавай Татьяна Гамалея Рутул районда агьалияр кьабулна.

Мярекатда райондин кьилин заместитель Арсен Къулиева, агъсакъалрин советдин председатель Эмин Эминова ва Дагъустан Республикадин Халкьдин Собранидин депутат Давуд Сулейманова иштиракна.

Татьяна Гамалея агьалийрин арзайрихъ яб акална. ИкI, райондин дишегьлийрин советдин председатель Индира Салмановади яшайишдин шартIариз килигна дагълух хуьрерай агьалияр шегьерриз куьч хьунин тIал алай месэла къа­­ра­гъарна ва министрдивай и кардиз фикир гун, дагълух хуьрер хуьн патал куь­мек гун­ тIа­лабна. Агьалияр шегьерриз куьч хьунин кьилин себеб кIвалахдай чкаяр та­хьун тирдини къейдна арзачиди. “Эгер чаз яшайишдин шартIар ярат­ми­шайтIа ва кIвалахдай чкаяр теш­ки­лайтIа, чун санизни фидач. Хуьрерай шегьерриз­ куьч жезвай агьалийрин кьадар екеди я: йиса 600-700 кас”, — алава хъувуна И.Салманова­ди­­.

Рутулрин 2-нумрадин школадин директор Нельсон Султанова аялри чирвилер къачузвай школайрин гзаф дараматар авай гьалдикай ихтилат кудна. Адан гафарай, 200-дав агакьна аялри школадин типовой тушир дараматда чирвилер къачузва. Ана хатасузвилин, сагъламвал хуьнин ва михьивилерин гьич са къанундални амалзавач. “2008-йисуз школадин цIийи дарамат эцигиз башламишнай. 2012-йисалди эцигунар хъсан еришралди кьиле физвай, гуьгъуьнлай малум тушир себебрикди кIвалахар акъвазарна…”, — лагьана директорди ва куьгьне школа чкIидай гьалда авайди къейдна.

Агьалияр кьабулунин серенжемдин сергьятра аваз хуьрерин культурадин кIвалер ремонтунин, тарихдин парк туькIуьрунин, кадастрдин картадин сергьятриз талукь месэлаярни къарагъарна.

Татьяна Гамалея агьалийриз чпин арзаяр фикир тагана тан тийидайди ва талукь идарайриз запросар ракъурдайди лагьана.

Агьалияр кьабулна куьтягь хьайи­далай кьулухъ, райондин активдин иш­ти­раквал аваз, заседание хьана. КIватI хьанвайбуру район газламишунин, хъвадай­ целди таъминарунин карда авай месэлаяр къарагъарна. Рекьер лап чIур хьунни, электрик экв мукьвал-мукьвал хкатунни заседанидал кьилин месэлаяр тир.

Чи мухбир