Дагъустан Республикадин зегьметдин ва яшайишдин жигьетдай вилик тухунин министрдин везифаяр вахтуналди тамамарзавай Расул Ибрагьимов мергьяматлувилин “Леки” фондунин векил Фарман Шайдабеговахъ галаз гуьруьшмиш хьана.
РикIел хкин, алатай йисуз “Леки” фондуни Ахцегь районда кардик квай аялрин ва жаванрин реабилитациядин центрадиз чарасуз герек мебель ва махсус “Гроссан тренажёр” ганай. Центрада авай аялриз чпин патахъай игьтияж авай и тадаракар набутар патал халис савкьат я. Кьиблепатан Дагъустандин амай районрани “Леки” фондуни игьтияж авайбуруз куьмекар гузва. Фондуни Къурбанд сувариз ва Чирвилерин йикъан вилик тешкилай серенжемрини виридан фикир желбнай, ачух рикIелди куьмекар гунай сагърай лагьанай. Цуругърин хуьре кьилел буба аламачир хизандин кIвал цIай кьуна кайилани, абуруз яшамиш жедай кIвал эхцигунни гьа и фондунин кар тушни мегер. “Лекидин” вилик мадни чIехи планар, мурадар ква. Къуватар гурай чпиз.
Мугьмандихъ галаз салам-калам хьайидалай кьулухъ Расул Ибрагьимова аялриз къуллугъзавай идарайрин кIвалах кьезиларунин, хъсанарунин кардин важиблувиликай лагьана.
— Заз чизва, чи къаюмвилик квай идарадиз куьне ганвай куьмекар. Аллагь рази жедай и кардай квез ва “Леки” фондунин командадиз за сагърай лугьузва, — алава хъувуна ада.
Фарман Шайдабегова Дагъустанда ва адалай къеце патани фондуни кIвалах тухузвай кар алай хилерикай суьгьбетна.
Гуьруьшдин эхирдай министрдин везифаяр вахтуналди тамамарзавай Расул Ибрагьимова Фарман Шайдабеговав РД-дин Минтруддин патай Чухсагъулдин чар вахкана.
«Лезги газет»
