2-августдиз Дербент шегьердин “Нарын къеледа” “Зи Дагъустан” конкурсда иштирак авун патал арзаяр кьабулна акьалтlару­низ ва нетижаяр кьуниз талукьарнавай пресс-конференция кьиле фена.

И мярекатда РД-дин Гьукуматдин Председатель Артем Здунова, Дагъустандин Кьи­лин ва Гьукуматдин Администрациядин руководитель Владимир Иванова, “Зи Да­гъустан” конкурсдин мярекатриз къимет гузвай блокдин руководитель Юлия Лузановади, РД-дин Халкьдин Собранидин председателдин заместитель Елена Ельниковади, ДГУНХ-дин ректор Ягьия Бучаева, Дербент шегьердин кьилин везифаяр вахтуналди тамамарзавай Энрик Муслимова, Дербент райондин кьилин везифаяр вахтуналди тамамарзавай Фуад Шихиева, республикадин гьукуматдин ва аслу тушир СМИ-рин руководителри, корреспондентри, блогерри ва масабуру иштиракна.

“Зи Дагъустан” конкурсдин асул макьсад пешекарвилин вини дережа авай, Да­гъус­тан­дин хушбахтвал патал менфятлудаказ кlва­лахиз алакьдай руководителар жагъурун я.

Журналистриз хуш гафар лугьуналди, Артем Здунова асиррин тарих авай къадим Дербент шегьерда “Зи Дагъустан” конкурсдин сифтегьан нетижаяр кьунихъ чlехи метлеб авайди къейдна.

— Дагъустандин Кьилин тапшуругъдалди чи гьукуматди кадрийрин резервияр гьазурдай  программа кьилиз акъудзава, -давамарна ада. — Чна и кlвалах “Россия — мумкинвилерин уьлкве” коммерциядинди тушир автономный тешкилатдихъ галаз санал цlийи де­режада аваз кьиле тухузва. Чун атанвай арзайриз дикъетдивди килигзава, гьикI лагьай­тIа, Дагъустандин министерствоярни ведомствояр конкурсдин гъалибчийрал вил алаз акъвазнава. Идалайни гъейри, гъалибчияр чкайрал алай экономикадин,  здравоохраненидин ва образованидин  идарайрини гуьзлемишзава.

Владимир Иванова конкурсдиз 11  агъзур чар атайди къейдна. Инсанри кхьенвай гзаф чарар конкурс тухунай сагърай лугьузвайбур тир. Абуру кадрийрин проект давамардайдак ва нетижалуди  жедайдак умуд кутазва.

Конкурсдин географиядиз талукь яз В. Иванова къейдна хьи, Россиядин гьар са региондай конкурсдиз арзаяр атана. 85 регионда яшамиш жезвай дагъустанвийри конкурсда иштирак авун патал кхьенва. Арзаяр гьакlни Америкадай, Украинадай, Прибалтикадайни атанва. Виридалайни гзаф арзаяр Москвадай, Московский областдай, Ставропольский крайдай, Санкт-Петербург шегьердай ва  Ханты-Мансийский округдай кхьенва. Ида патал яшамиш жезвай дагъустанвийрин рикl ватандихъ кузвайди ва абуруз ватан абад авуник чпин пайни кутаз кlанза­вайди къалурзава.

Ахпа ам иштиракчийрин яшарал, савадлувилел ва тежрибадал акъвазна. Икl, иштиракзавайбурун 45,9 процент -35 йисал къведалди яшар хьанвайбур ва 54,1 процент ксарни — 35 йисалай виниз тир яшар хьанвайбур я. Виридалайни жегьилдан 21 йис  ва тежриба авай виридалайни яшлудан 71 йис я.  Проектдин иштиракчийрин чIехи  паюниз кьилин образование ава. Абурукай 7 процент илимдин кандидатар, 1 процент илимдин докторар я.  25,3 процент — дишегьлияр я. Конкурс­дин иштиракчияр 34 чlалалди рахазва.

“Зи Дагъустан” конкурсдин иштиракчийрин коллективдин суьретдин презентация акьалтlаруналди, В. Иванова конкурсдикай агьалияр хабардар авунин рекье прессадин роль къейдна ва журналистриз сагърай лагьана.

Вичин нубатдай Юлия Лузановади тестирование гьикl кьиле фидатlа, дистанционный тестированидин тапшуругърикай ва къимет гунин къайдадикай лагьана. Конкурсдин иштиракчийриз идара авунин агалкьунриз ва кхьена кlанзавай эсседиз килигна къимет гуда.

— Чи кьилин везифа Дагъустандин Гьукуматдин идарайриз, и чилел яшамиш жез, хайи чилел уьмуьр хъсанарун патал кlвала­хиз кlандай дагъустанвияр гъун ва абуруз кlва­лах­дай хъсан шартlар яратмишун я.

Ягьия Бучаев конкурсдин шартIарал дуьз­гуьндаказ амал авун таъминарунин серенжемрал акъвазна.  Адан гафарай малум хьайивал, конкурсдин кьвед лагьай паюниз 5258 кас ахъайнава. И ксари гьазурнавай документар, образованидин дережа эцигнавай  истемишунрив дуьм-дуьздаказ кьазва.

Ахпа пресс-конференция “суал-жаваб” къайдада давам хьана.

“Конкурсда дагъустанвийри активдаказ иштирак авун квехъ галаз алакъаллу я?” — суалдиз, В.Иванова халкьди чlехи дережада ихтибарвал авун я”, лагьана.

Къагьриман Ибрагьимов