29-июнь — Россиядин жегьилрин югъ

Сувар къейдда

29-июндиз Россияда, гьа гьисабдай яз Дагъустандани, жегьилрин югъ къейд авуниз талукьарна, кьиле тухудай мярекатрикай и йикъара «Дагъус­тан»­ РИА-дин конференц-залда хьайи гуьруьшдал РД-дин жегьилрин крарин рекьяй министр Камил Саидова суьгьбетна. Кьи­линди суварин юкъуз­ и ва я маса карда,­ кIелунра, спортда ва маса хилера агалкьу­нар авай, тафаватлу хьайи жегьилар (кьилди къачуртIа, къенин юкъуз чеб галачиз са мярекатни кьиле фин тийизвай волонтёрар) руьгьламишун, теб­рик авун я. Мярекатар, меркезда хьиз, республикадин вири муниципалитетрани кьиле тухун пландик ква. Дагъларин уьл­кведа 35 йисал къведалди яшара авайбур жегьилар яз гьисабзава.

— Меркезда вири мярекатар  Ленинан майдандал кьиле тухуда. Абур нисинин сятдин 3-далай нянин 10-далди давам жеда. Гегьенш программадик жуьреба-жуь­ре мастер-классар, спортдин серенжемар, яратмишунардай кол­­лективрин концертар ква. Мадни жуьреба-жуьре хилерай, гьа гьисабдай яз шикилар чIугунай, шиирар кIелунай гъвечIи майдан­рал жегьилривай чпин устадвал­ къалуриз жеда. ГьакIни чирвилер­ гунин рекьяй «алачухри» кIва­лах­да. ЧIехи сегьне  жегьилрин ара­да машгьур манидаррин — Элманан, Андродин ва Шамидин —  ихтиярда гьатда, — къейдна К. Саи­дова.

Са гафуналди, и юкъуз меркездин майдандал гьар садаз вичин рикIиз хуш са вуч ятIани жа­гъи­да. Спортдин серенжемрикай рахадайла, министрди алава хъувурвал, жегьилривай 100 метрдиз чукурунай, волейболдай ва маса жуьрейрай  чпин устадвал къалуриз жеда.

Камил Саидован гафарай, Да­гъустандин зегьметдин ва яшайиш­ вилик финин министерстводин куьмекни галаз и юкъуз жегьилар­ патал меркездин кьилин майдан­дал «пеше жагъурдай ярмарка»­ тешкилда. Адан кьилин макьсад,­ жегьилриз кIвалах жагъурдай мум­кинвал гунихъ галаз сад хьиз, школада кIелзавай аялриз, жаванриз алай девирда гьихьтин пешейрин­ жигьетдай игьтияж аватIа чирдай­, гележегда чеб патал кIвалах гьатдай пеше хкядай мумкинвални гуникай ибарат я. Идалайни гъейри, кьабулунин кампанийрив эгечI­навай республикадин вузри­ абитуриентар патал майданар ачухда.

Министрди майдандал кьиле фидай мярекатра иштиракдай ният авай гьар садаз жегьилрин крарин рекьяй федеральный агентстводин (Росмолодёжь) порталда виликамаз регистрация хьун лазим тирди лагьана. Амма и кар кьилиз акъудиз тахьайбуруз майдандал волонтерри куьмекда. Мадни суварик хизанар  галаз атун теклифна, гьикI хьи, кьилди аялар патални са шумуд майдан (шикилар чIугвадай, къугъвадай, манияр лугьудай ва икI мад) кардик жеда.

Рагнеда Рамалданова