Алатай гьафтеда Дербентда, меж­дународный транспортдин­ «Кеферпад-Кьиблепад» коридор­дин месэлаяр еримлу авунин­ сергьятра аваз, санал кIва­лаху­низ талукь яз, Россиядин, Азербайжандин ва Ирандин дипломатрин иштираквал авай  пуд терефдин заседание кьиле фена.

Заседанида 27 пешекарди иш­тиракна: гьар терефдин патай — 9 касди. Россиядин делегациядин кьиле РФ-дин автомобилрин ва ше­гьеррин жемятди ишлемишзавай транспортдин  хиле государст­водин сиясат кьиле тухунин рекьяй Департаментдин директор Сергей Семенов авай. Делегациядик гьакIни  РФ-дин экономикадин ва мулкар виликди тухунин минис­терстводин, РФ-дин федеральный­ таможнядин къуллугъдин ва транс­портдин хиле гуьзчивал авунин рекьяй федеральный къуллугъдин пешекарар квай.

РД-дин  гьукуматдин патай заседанида вице-премьер Ризван­ Гъазимегьамедова, РД-дин экономикадин ва мулкар виликди тухунин министрдин заместитель Шамил Аммаева, Россиядин МИД-дин Махачкъалада авай векилханадин руководитель Марат Османова, гьакIни месэладихъ галаз алакъалу маса идарайрин векилри иштиракна.

Къейд авурвал, Россиядин властри «Кеферпад-Кьиблепад» кор­ридор Суэцкий къаналдин мумкинвилер авай рехъ хьуник (альтернатива)  ва ада метягь транзит­дин къайдада гьам Европадиз, гьам­ни Россиядай Персидский заливдиз агакьакьарун таъминардай­ мумкинвал гуник умуд кутунва. «Ке­ферпад-Кьиблепад» рекьин кье­тIен важиблувал авай ва  чилелай­ физвай участок РФ-дин,  Азербай­жандин ва Ирандин  мулкарал гьалтзава. Алай вахтунда чIехи пай шейэр анай пар чIугвадай машинрин куьмекдалди тухузва.

Заседанидин вахтунда Моск­вадин, Тегерандин ва Бакудин ве­килар пар чIугвадай машинра аваз тухузвай метягьдиз талукь яз рабочий десте тешкилунин гьакъиндай икьрар хьана.

«Ирандин терефдихъ галаз  и гуьруьш тешкилунин гьакъиндай­  2024-йисан февралдиз икьрар хьанай. Азербайжандин терефдихъ га­лаз чун кьве терефдин къайдада икьрар хьана», — лагьана Россия­дин патай делегациядик кваз гуьруьшда иштиракай Иранда РФ-дин алишверишдин рекьяй векилханадин пешекар Андрей Танаева.

Пуд терефдин рахунар кьиле тухудалди вилик делегатри Россиядинни Азербайжандин, гьакIни Азербайжандинни Ирандин сергьятрал   пограничный ва таможнядин  терминалар  ахтармишна.

«Сергьятдилай ахъайдай «Ярагъ­-Къазмаяр»  пунктуна вири кIвалахар «са пенжердин» къайдада кьиле физва — документар вугузва, 30-40 декьикьадин вахтунда абур гьазурзава, водителдив вахкузва, ам рекье гьатзава», — лагьана А.Танаева, вичив  пар чIуг­вадай машиндин водителдин патай анжах  разивилин келимаяр агакьайди къейд авуналди.

Амина Муслимова