СВО-дин иштиракчи, «Жуьрэтлувиляй» ордендин сагьиб Мисри Ибрагьимовахъ галаз и мукьвара Кьурагь райондин кьил Замир Азизов гуьруьшмиш хьана. Гуьруьшда КЦСОН-дин директор Э.Гьажиева, дишегьлийрин жемиятдин советдин председатель Э.Исаевади ва КСП-дин (контрольно-счетная палата) председатель И.Муслимова иштиракна. 

М.Ибрагьимов Штулрин хуьряй я. Ада СВО башламишай сифте йикъалай Ватандин итижар хуьзва. Алай вахтунда ам хайи хуьруьз отпускдиз хтанва.

Дяведин махсус серенжем кьиле фидай вахтунда адал херни хьана. Къалурай игитвилерай адаз орден гана.

Райондин регьберди намуслувилелди аскервилин буржи тамамарзавай ватанэгьлидиз сагърай лагьана. Гьа са вахтунда СВО-дин иштиракчийриз куьмек гунин серенжемарни веревирдна. Аскердивай яшайишдихъ галаз алакъалу месэлайрин патахъай хабарар кьуна. Ихьтин регьят тушир вахтунда, райондин кьили къейд авурвал, СВО-дин иштиракчийриз, абурун хизанриз куьмекар гун вири дережайрин гьукумдарри фикир гана кIанзавай месэла я. Эхирдай ада аскердив Чухсагъулдин чар вахкана.

Чи мухбир