Алатай гьафтеда РД-дин Кьил Сергей Меликова Москвада РФ-дин энергетикадин министр Сергей Цивилевахъ галаз гуьруьш кьиле тухвана. Идакай «Лезги газетдиз» РД-дин Кьилин пресс-къуллугъди хабар гузва.
Дагъустандин энергетикадин месэлаяр гьялунин рекьяй федеральный штабдин кьиле акъвазнавай энергетикадин министрдин заместитель Евгений Грабчакан, Дагъустандин вице-премьер Манвел Мажонцан иштираквал аваз республикадин энергетикадин комплекс еримлу авунихъ галаз алакъалу крар веревирдна.
Кьилди къачуртIа, гуьруьшдин иштиракчияр Дагъустандин энергетикадин къурулушдин мягькемвални нетижалувал артухаруникай, гатун цикIиз энергетикадин хилел акьалтзавай парциз дурум гуникай ва зулунни хъуьтIуьн муддатдиз гьазур хьуникай, гьакIни и къурулушда аварияр арадал гъизвай себебар арадай акъудуникай рахана.
Дагъустан патал метлеблу тир гуьруьшдикай Сергей Меликова вичин телеграм-каналда ихьтин фикир лагьана: «Сергей Евгеньевича республикадин энергокъурулушдин нетижалувал хкажуниз рикIин сидкьидай итиж авуна. Авай гьалдихъ галаз чкадал таниш хьун патал адаз чна чи республикадиз атун теклифна. За умуд кутазвайвал, мукьвара чавай чи ихтилат Дагъустандин чилел давамар хъийиз жеда.
Чун патал и гуьруьшдин кьилин нетижа ам я хьи, чун РФ-дин энергетикадин министерстводин патай куьмек агакьдайдахъ инанмиш хьана. И карди чи вилик акъвазнавай тапшуругъар саналди тир къуватралди, кам-камунаваз гьялиз хьунин умудлувал гузва».
Салим Салимов
