Дагъустандин здравоохраненидин хи­ле къайда авани? И хилез агьалийри­ санлай ихтибар ийизвани? Наразибурун­ кьадардилай разибурун кьадар гзаф яни? Суалар, куьн гъавурда акьазвайвал, риторикадинбур жезва.

Медидарайра кIвалахзавай хейлинбуру акъудзавай уюнарни кьуьруькар такур жегьилни агьил бажагьат ама респуб­ликада. Гьавиляй здравоохраненидин хи­­ле ришветбазвилихъ галаз тухузвай кIва­­лахдиз РД-дин Кьил Сергей Меликова рази тежедай къимет гун гзафбур патал тажуб жедай делил туш. Ада къейдна хьи, коррупциядин рекьяй медицинадин хел кIвенкIвечи чкадал ала, амма мес­эла гьялун патал кьабулзавай серенжемар лагьайтIа, бес кьадардинбур туш.

Медицинада гзафни-гзаф жезвай риш­ветбазвилин дуьшуьшрикай и хилен ми­нистерстводин регьбер Татьяна Беляевади ихтилатна. «Гьихьтин къуллугъчияр жавабдарвилиз чIугуна? Маса каби­нет­диз ракъурна кIани чкадал начагъ инсан пулунихъ къуллугъ ийизвай хсуси­ кли­никайриз рекье твазва. Духтурдив ла­гьай­тIа, и кардай «пишкеш» агакьзава. И нагьакьан кар арадай акъудун патал гьакъикъидаказ вуч ийизва?» — лугьузва ада.

ТIал алай месэладиз талукь темадай кьиле фейи совещанидал здравоохраненидин хилел гуьзчивал тухузвай федеральный къуллугъдин РД-дин мулкарин органдин кьиле авай Тамирлан Мугьамедова вичин баянарни гана. Къейд авурвал, 2023-йисуз административный ихтиярар чIурунай 13 протокол туькIуьрна. Амма ада къалурай рекъем, коррупциядин «гегьеншвилер» фикирда кьурла, рес­публикадин регьберди лугьуз тежедай кьван агъузди я лагьана. Гьелбетда, им, рагъ алай югъ хьиз, ашкара месэла я.

Гьукуматдин медидарада кIвалах­за­вай духтурдин патав фейила, начагъ инсанар гьа са духтурри чпи ва чпин «чирх­чирри» кIвалахзавай хсуси медцентрайриз ракъурун, пулсуздаказ къуллугъ авуна кIани чкайра гуя жезвай гзаф йи­къа­рин учирралди къурхуяр гун кутугнавай амал яни Гиппократан кьин кьунвайбуруз, адалатлувал рикIелай алатнавайбуруз? Шак алачиз, чал чпин везифаяр намуслувилелди кьилиз акъудзавайбурни гзаф гьалтзава. Вирибурун гьакъиндай икI лугьуз жедач, гьатта чеб пешекарвилин жигьетдай вини дережада авайбур, тежрибалубур ятIани.

Вири здравоохраненидин хиле фадлай авай кьуьруькар я. «Ихтияр ава — акъуд­да за жуваз кIани уюн!» — на лугьуди, ихьтин келимаяр бязи жавабдар ксари девиздиз элкъуьрнава.

Гьавиляй региондин регьберди рази­сузвилелди алава хъувуна: «И 13 протокол коррупциядин дережадив гьикьван кьазва? И месэладай зав гзаф арзаяр агакьзава. За фикирзава хьи, куьне къе рази тежедай тегьерда кIвалахзава».

Къарагъарнавай месэладин патахъай­ С.Меликова 1-июлдалди гьакъикъи тек­лифар малумарунин тапшуругъ гана. Килигин, ана вуч акъатдатIа.

К. Къалажухви