Гьар нивай хьайитIани шиирар теснифиз,­ манияр лугьуз, суьретрал чан гъиз, илимар муьтIуьгъариз жедач. Ибур анжах чпихъ акьалтIай алакьунар авайбурун тIем акакьдай крар я. Ихьтин бажарагъ шукур хьайи Аллагьди инсандиз гузвай пай я.

КьетIен алакьунар, бажарагъ авай жегьилрикай яз чавай Россиядин Игит Радим Халикьован тIварунихъ галай юкьван школадин 11-классдин ученик, республикадин ва Вирироссиядин школьникрин олимпиадайра гъалибвилер къачур Алибалаев Мирзехан Казбековичан тIвар кьаз жеда.

Жуьреба-жуьре тарсарай дерин чирвилералди Мирзехан неинки райондин, гьакI республикадин дережада бажарагълу жегьилрин арада ава.

Кьулан СтIалрин школадин муаллимри чаз М. Алибалаеван алакьунрин «дувулар» и тухумдин «деринра» авайдини къейдна: Мирзехан 50-йисара СССР-да машгьур гамаринни халичайрин устад Рабият Алияровадин (Алибалаевадин) — птул, дидедин патай 1917-йисуз Кьасумхуьрел сифтегьан светский школа ачухай Шагьрузат Султановадин хтул я.

Мирзехан 2007-йисан 21-мартдиз Кьулан СтIалдал дидедиз хьана, 2013-йисуз ам 1-классдиз фена. Адан сад лагьай муаллим Абидат Мирзекеримова я.

Сифтегьан классдилай эгечIна, М. Алибалаева анжах «5» къиметар аваз кIелзава. Ам самбодал ва дзюдодал машгъул жезва. Ада шахматрин секцияда ва кьуьлерин кружокда иштиракзава. Ам самбодай Дагъус­тан Республикадин кIвенкIвечивал патал тухвай акъажунрин гъалибчини я.

2021-2022 ва 2022-2023-кIелунин йисара М. Алибалаева химиядай, ингилис­ чIа­лай, тарихдай, обществознанидай­ ва пра­водай Вирироссиядин школьникрин олимпиадайрин муниципальный паяра приз­дин чкаяр кьуна. Школадин общественный уьмуьр­да ва «День тренингов» проектда активвилелди иштиракунай Мирзехан Чухсагъулдин чарчиз лайихлу хьана.

«Патриотизм как фундамент российской государственности» Вирироссиядин­ форумдин вилик Мирзехан Алибалаева «Золотое правило укрепления фундамента государственности» илимдин макъала­ кхьена. Форумдин нетижайриз килигна, ма­къала «Сборник тезисов, докладов и научных статей» кIватIалда гьатна.

М. Алибалаеван макъаладиз Татарстан Республикада чапдай акъатзавай «Молодой ученый» журналди фикир гана, макъа­ла 2023-йисуз журналдин 5-нумрада чапна. Илимдин макъала гунай «Молодой ­ученый» журналдин кьилин редактор, ­технический илимрин кандидат И. Агьметова­ Чухсагъул­дин чар ва тIвар кхьенвай Шагьадатнама (Свидетельство СШ №06808521) рахкурна.

Гьа и 2023-йисуз хкягъу­на гъалиб хьайи Мирзеха­наз обществознание пред­метдай­ Россиядин ФСБ-дин ведомстводин образованидин организацийрин регионрин арадин олимпиададин финалдиз Москвадиз теклифна. Ана М. Алибалаевакай гъалибчи хьана.

И олимпиададин нетижайрай РФ-дин ФСБ-дин РД-да авай Управлениди Махачкъалада тешкилай шадвилин мярекатдал Мирзеханав Диплом вахкана ва адаз ФСБ-дин музейда экскурсия тешкилна.

КIелуна ва общественный уьмуьрда­ хьанвай кьетIен агалкьунрай 2023-йисуз РД-дин образованидин ва илимдин министр Я.Бучаева Чухсагъулдин чар гана.

М. Алибалаев Россиядин школьникрин олимпиадайрин Советдин председатель, М. В. Ломоносован тIварунихъ галай МГУ-дин ректор В. А. Садовничийдин къул алай Дипломдиз лайихлу хьана. Мирзехан «Таланты России» ГИР-дин сиягьдик кутунва.

2023-2024-йисара М. Алибалаева обществознанидай ва праводай Вирироссиядин олимпиадайрин региондин паяра гъалибвилер къачуна.

Хкягъунин нетижайрай М. Алибалаеваз­ ­обществознанидай Россиядин ФСБ-дин «Меж­региональная олимпиада школьников­ на базе ведомственных образовательных ор­­га­низаций», праводай «Фемида», праводай­ «Кутафинский», обществознанидай «По­кори Воробьевы горы!» олимпиадайриз тек­лифна. Финалар Москвада кьиле фена. Вири­ олимпиадайра Мирзехана приздин чкаяр кьуна.

…Бажарагъ, лежберди никIе цанвай къуьлуьн твар хьиз, фараш жезва. Са кьадар вахт алатайла, ада бегьер гузва. Чун инанмиш я хьи, М. Алибалаеван алакьунри, кьетIен бажарагъди гележегда хъсан бегьерни гуда.

Хазран  Кьасумов