Республикада кIелунин алатай йисуз кардик хьайи, пеше хкягъунихъ элкъуьрнавай «Гележегдиз билет» проектдин нетижаяр кьуна. РД-дин образованидин ва илимдин министерстводин пресс-къуллугъди хабар гузвайвал, гележегдин пешедин рехъ гьеле гъвечIизамаз хкягъунин проектда Дагъустандин мектебра кIелзавай 65 агъзурдалай гзаф аялри (абурукай 200-далай гзафбур сагъламвилин мумкинвилер сергьятламишбур (ОВЗ) я), директоррин тербияламишунин рекьяй са агъзурдалай гзаф меслятчийри, образованидин 818 идаради ва 55 амадагди-кIвалахдалди таъминардайбуру иштиракна.
Проектдин вилик акъвазнавай асул месэлайрик мектебра кIелзавай аялар пеше хкягъуниз гьазурун, регионра пеше хкягъунин рекье куьмек гузвай такьатрин кьадар гегьеншарун, ОВЗ авай аялар патал махсус программаяр арадал гъун, зигьиндин, кьатIунрин дережадилай, итижрилай ва мумкинвилерилай аслу яз, гуз жедай меслятар, теклифар гьазурун, гьакIни аялар зегьметдин базардин кьетIенвилерихъ галаз танишарун акатзава.
Пеше хкягъунин рекье куьмек гузвай такьатрик, мисал яз, тестер акатзава. Инсандин кьатIунар ва мумкинвилер ахтармишиз куьмек гудай гьар жуьредин гзаф тестер ава.
ГьакIни и жигьетдай фикир онлайн-ресурсриз ва приложенийриз гуз жеда. Месела, «ПроеКТОриЯ» сайтди гьар жуьредин хилера машгьур ксарин видеотарсар, мастер-классар ва лекцияр теклифзава.
«Гележегдиз билет» проектдин сергьятра аваз, пеше хкягъунихъ элкъуьрнавай тарсар, психологиядин рекьяй ахтармишунар, экскурсияр, мастер-классар, профпробаяр, пешейриз талукь фестивалар ва мультимедиадин куьмекдалди гьазурнавай выставкаяр-тежрибаяр кьиле тухвана.
КIватIнавай тежрибади аялриз чпиз бегенмиш тир ва абурун алакьунриз жаваб гузвай хилер хкягъунин карда дуьз къарар кьабулиз ва гележегда агалкьунар авай пешекарар жез куьмекда», — гьисабзава пешедин рекьяй виликамаз гьазурунин Центрадин векил Юлия Сизиковади.
Амина Муслимова
