Дагъустандин государстводин педагогикадин университетда СтIал Сулейманан юбилейдиз бахшнавай сувар гегьеншдиз кьиле фена. Гъиле авай йисуз тухванвай ва тухун хъийидай чIехи шаирдин юбилейдин мярекатрикай педагогикадин университетдин муаллимринни студентрин коллективди гьазурай сувар, шаксуз, программадин девлетлувилелди ва кьетIенвилелди рикIел аламукьда. Суварихъ галаз санал университетда СтIал Сулейманан уьмуьрдиз ва яратмишунриз бахшнавай илимдинни тежрибадин международный конференциядини кIвалахна. И югъ, 6-июнь, 255 йис идалай вилик А.С. Пушкин дуьньядиз атай ва дуьньяда Урус чIалан югъ яз малумарнавайдини хьана.
Университетдин дараматдин вилик мугьманар музыкадин ансамблди тамамарзавай гьавайралди къаршиламишзавай. КIватI жезвай инсанри студентрин художественный самодеятельностдикай чеб чпихъ галаз рахазвай кьве жегьилдиз фикир тагана амукьнач. Абурукай садал чаз Пушкинан шикилрай хъсандиз чидай, а девирдин партал, кьилелни цилиндр — кьакьан шляпа алай, муькуьдал — дагъвидин чухва, кьилелни тилер яргъи бапIах. «Хабар закай чкIида вири зурба Русь тирвал, зи тIвар кьада ана гьар са чIалал», кхьенай Пушкина вичин эхиримжибурукай тир «Гуьмбет» шиирда. Малум тирвал, Сулейманаз вичин уьмуьрдин эхирда адан эсерар чир хьанай ва ада Пушкиназ шиирни теснифнай. Ингье, гуя девиррилай, кьве шаир гьалтна…
Сувар педуниверситетдин ректор Нариман Асварова ачухна. СтIал Сулейманан райондин кьилин сад лагьай заместитель Лацис Оружевани виридаз сувар мубаракна. Гуьгъуьнлай РД-дин милли политикадин ва динрин крарин рекьяй министр Энрик Муслимов, РД-дин халкьдин майишатдин университетдин ректор Агьмед Бучаев, Хуьруьн майишатдин университетдин ректор Зайдин Жамбулатов, республикадин меркездин собранидин председатель Марис Ильясов, республикадин Халкьдин Собранидин депутат Елена Павлюченко, ДГУ-дин профессор Людмила Авшалумова рахана.
Конференциядин пленарный заседанидал СтIал Сулейманан уьмуьрдикайни яратмишунрикай ва адан эсерар таржума авунин месэлайрикай докладар филологиядин илимрин доктор, профессор Ф. Нагъиева ва филологиядин илимрин доктор, профессор, ДГПУ-дин филологиядин факультетдин декан Руслан Къадимова авуна. Конференциядин кIвалах 7 секцияда кьиле фена. Абурал авур ва я виликамаз ракъурнавай докладринни илимдин кIвалахрин кьадар — гзаф, темаярни жуьрба-жуьре тир.
— Конференция гьазурун патал чи муаллимрини студентри чIехи кIвалах тухвана, ада рази жедай нетижайрални гъана, — къейдна филологиядин илимрин кандидат, доцент, ДГПУ-дин Жегьилрин крарин управленидин начальник Лаура Феталиевади.
Кьилди къачуртIа, Л. Феталиевадин вичин ва маса муаллимрин гъилик университетда кIелзавай къецепатан уьлквейрин (Азербайжандин, Юкьван Азиядин республикайрин) студентри гьазурнавай докладри фикир желбзава. Докладрин авторрик Анкарадай тир, Туьркияда Кавказдин ассоциацийрин конфедерациядин президент Фатин Дагчинаран ва Дагъустандин культурадин центрадин председатель Яшар Озан тIварарни ква.
Университетдин гегьенш гьаятда республикадин са жерге районрин милли майданарни ачухнавай. Белки, виридалайни вичел фикир желбзавайди, мугьманар рикIин ачухвилелди, жумартдиз, гуьрчегдиз кьабулзавайди Кьурагь райондин майдан тир жеди. Райондин культурадин, ял ягъунин ва туризмдин центрадин руководитель Абдулкъадир Будаева лагьана:
— Суварик ичIи гъиливди къведай адет туш эхир. Аквазвайвал, мугьманриз чи патан няметар хуш я: дагъдин хъчарин афарарни, хипен нисини, къвердавай машгьур жезвай «фан ядни», амай затIарни. Республикадин шегьерра ва районра чи «Кьурагь дагълар» халкьдин хор ва чи халкьдин театр хъсандиз чида, абуруни сувар гурлу ийида.
СтIал Сулейманан ктабрин ва шикилрин выставка, сеняткаррин выставкаяр, ДГПУ-дин художественно-графический факультетдин студентрин «Милли мода» выставка, студентрин гьевескар артистрин манийринни кьуьлерин нумраяр, Диляра Надировадини Малик Мустафаева, ашукь Шамшира ягъай манияр, симинин пагьливанрин студиядин векилри къалурай алакьунар — куьрелди, суварин мугьманриз вуч дадмишиз кIан хьайитIа, гьам авай, гьакI квез килигдатIа ва яб гудатIани. Югъни вижевайди, рагъ алай гуьзелди тир.
Чи мухбир
