РД-дин кьилин Чарчин цIарцIе аваз…
«2022-йисан февралдилай чи уьлкведин ва чакай гьар садан уьмуьр дегиш хьана. Къе чна кьатIузва хьи, цIийи миллетбазвилиз дурум гун ва адан винел гъалибвал къачун — им ата-бубайрин вилик чи буржи ва гележегдин несилрин вилик везифа я», — ихьтин гафар раижна Дагъустандин Кьил Сергей Меликова, РД-дин Халкьдин Собранидиз вичин Чар кIелдайла.
Регион еримлу авунин кар алай месэлаяр къалуруналди, Сергей Меликова нубатдин сеферда 29-майдиз кIелай Чар вири къурулушра кIвалахзавай жавабдар ксар патал амал ийидай кьилин документдиз элкъведа. Маса рехъ авач. Жуьреба-жуьре хилера арадал къвезвай татугай гьалари инсанрин яшайишдиз пис патахъай таъсирда. Ихтилат агьалияр целди, электричестводалди ара датIана таъминаруникай физва. И ва я маса хилера жезвай нагьакьан гьалар асул гьисабдай а къурулушра жавабдар къуллугърал алай ксарин жавабдарсузвилихъ галаз алакъалу я. Коррупциядин куьк хкудиз хьун тIебиисуз кар ятIани, и рекье чIугвазвай женгини геж хьиз хъсан нетижаяр тагъанани туш. Гьа са вухтунда са ришветбазди маса ришветбаз эвеззавай дуьшуьшар жезва. Чаз аквазвайвал, неинки чи республикадин, гьакI федеральный дережадин чIехи чиновникарни дустагъзава.
Къе гьар са важиблу къурулушда къуллугъдал алай жавабдар ксар халкьдин патай ихтибар къазанмишиз жедай, чеб ивидик инсанпересвални ватанпересвал квайбур хьун герек тирди республикадин Кьил С.Меликовани, уьлкведин Президент В.Путинани аннамишзава.
Россияди, Донбассдин агьалийрин тереф хуьналди, Украинада миллетбазриз акси яз кьиле тухузвай СВО-ди вирибуруз халисан ватанпересвал, ихтибарлувал, инсанвал вуч ятIа чирна.
СВО-ди халисан ватанпересарни тапан ватанпересар сафунай яна. Гзафбур — депутатар, артистар, жавабдар къуллугъчияр — къурхутмиш хьана. Хсуси хам, бизнес, девлет хуьн патал абуру декьикьайрин къене уьлкве маса гана. Бязибур, ийир-тийир квахьайбур хьиз, катай чкайра чеб «кьамал кьадайбур» такурла, гуьгъуьнлай перишан хьана, амма чизва хьи, кьулухъ хъфидай рехъ амач.
Дяведин махсус серенжемда иштиракзавайбурун, абурун багърийрин гьакъиндай къайгъударвал авун уьлкведин регьберди вири регионрин кьилерин вилик эцигнавай эвелимжи везифайрик акатзава. И рекьяй, зи фикирдалди, Сергей Меликов тафаватлу жезва. Идан гьакъиндай мукьвал-мукьвал махсус серенжемдин иштиракчийрихъ, багърийрихъ галаз гуьруьшар тешкилуни, абурун вири месэлаяр гьялунин рекьер жагъуруни шагьидвалзава.
К. Ферзалиев
