РФ-дин Президент Владимир Путинан Указдалди республикадин образованидин центрадин директор Анжела Байрамбеговна Байрамбеговадиз «Россиядин Федерациядин лайихлу муаллим» тIвар ганва. Талукь Указ алай йисан 29-майдиз акъатнава.
Анжела Байрамбеговадин бине Хив райондин Хъукьварин хуьряй я. 2017-йисалай инихъ ада республикадин образованидин центрадиз регьбервал гузва. И йисара адан регьбервилик кваз чирвилерин макандихъ еке агалкьунар хьана ва алай вахтунда образованидин центр Дагъустандин образованидин идарайрин арада чешнелубурукай сад яз гьисабзава.
Анжела Байрамбегова «Лезги газетдин» вафалу амадагрикайни сад я. Гьар йисуз хайи чIалал акъатзавай газетдин тираж артух хьуник ада вичин пайни кутазва. Хайи чIалахъ, чилихъ рикI кузвай и баркаллу рушаз, вахаз, дидедиз ватанэгьлийрин арада еке гьуьрмет ава.
«Лезги газетдин» редакциядин коллективди Анжела Байрамбеговнадиз и чIехи агалкьун рикIин сидкьидай мубаракзава ва адахъ чандин сагъвал, мадни кьакьан кукIушар муьтIуьгъардай къуватар хьана кIанзава.
