Газетдин виликан нумрада хабар ганвайвал, 27-28-майдиз Бакуда грэпплингдай Европадин чемпионатда чпин ери-бине Ахцегь райондин Фиярин хуьряй тир, алай вахтунда Махачкъалада яшамиш жезвай Гьабиб Атлуев ва Артур Агъаширинов 66 кг-дин заланвал авайбурун арада 1-чкайриз лайихлу хьана. Артура гимишдин медални къазанмишна.
3-июндиз Ахцегьа райондин кьиле авай ксарин ва общественностдин векилри пагьливанар далдам-зуьрнедалди къаршиламишна. Хваш-беш авурдалай кьулухъ абур (чпихъ галай вири итимарни галаз) Ахцегь райондин регьбер Абдул-Керим Палчаева шад гьалара кьабулна. Кьилди вичин, райсобранидин депутатрин ва жемятдин патай ада чемпионриз тебрикдин хуш келимаяр лагьана, абурун лайихлувилер чухсагъулдин чараралдини пулдин пишкешралди къейдна.
— Чун хайи ватанда вилик-кьилик квай ксарини жемятди лап багьа мугьманар хьиз къаршиламишунай куьн пара кьадар сагърай! Къе куьне чун мадни гьевеслу ва къуватлу авуна, — лагьана Европадин чемпионри.
Шад мярекатдал Фиярин агъсакъалрин советдин председатель Идаят Насировни рахана.
— Чи хуьруьн жегьил пагьливанар багърияр хьиз агъмишна, райондин активдин совещанидал икI зурбаз тебрик авунай куьн вири сагърай! Эхиримжи вахтунда зун райондиз, хайи хуьруьз хтайла, рикI шадвилин гьиссерив ацIузва. Къе чаз пара хъсан муьгъ, школа хьанва. Хиве кьан, ибур гьеле за Фиярин хуьруьн колхоздин председателвиле кIвалахдай чIавуз халкьдин эрзиман мурадар тир. Чалай алакьнач. Абдул-Керим Нажмудиновича кьилиз акъудна. Гила ам хуьруьн обелиск, рекьер, тарихдин муьгъ туькIуьр хъувунин, аялар къугъвадай майдан туькIуьрунин къайгъудик ква. Хайи хуьр, бубайрин хъсан адетар хуьзвай крарик гила чун — фийивиярни — активнидаказ экечIда, — лагьана ада.
Отставкада авай полковник, Дагъустандин Игит, Махачкъаладин Общественный палатадин председателдин заместитель, РФ-дин писателринни журналистрин союзрин член Нисрет Исмаилова Гьабибни Артур, гьакI абур мадни еке агалкьунрал гьевесламишзавай, район аваданламишзавай Абдул-Керим Палчаев хьтин кьегьал ватандашар, рухваяр чи дамах тирди къейдна. Шадвилин келимайрилай кьулухъ ада вичин «Фиярин хуьр» шиир хуралай кIелна.
Дашдемир Шерифалиев
