Хайи чIалал рикI алай, конкурсрани олимпиадайра ашкъидалди, агалкьунралди иштиракзавай аялар чи мектебра тIимил авач. Докъузпара райондин Усугъчайдин юкьван мектебда кIелзавай Алина Бейтуева кIелунра тафаватлу жезвайбурукай я. Ада лезги чIалайни эдебиятдай республикадин дережада кьиле фейи акъажунра гъалибвилер къазанмишнава. Кьилди къачуртIа, 9-классда кIелзавайбурун арада Махачкъаладин 1-гимназияда лезги чIалай ва эдебиятдай кьиле фейи цIинин олимпиадайрин региондин паяра ада 1-чкаяр кьуна. Кьве олимпиадада гъалибвал къазанмишун санлай мектебдивай дамах ийиз жедай агалкьун я.
Къейд ийин, хайи чIаларайни эдебиятрай олимпиадаяр РД-дин илимдинни образованидин министерстводи ва А.Тахо-Годидин тIварцIихъ галай ДНИИП-ди тешкилна.
Алинадихъ хьанвай агалкьунар адаз лезги чIаланни эдебиятдин тарсар гузвай Альбина Аслановадин тежрибалувилин, гьакIни аялдин буба Казим Бейтуеван тербиядинни насигьатрин нетижа я лугьузни жеда.
Чирвилерин жигьетдай Алинади неинки лезги чIалайни эдебиятдай, гьакI амай предметрайни тафаватлувал къалурзава. Идан гьакъиндай ада муниципальный ва региондин дережада кьиле фейи гьар жуьре мярекатра кьазвай кIвенкIвечи чкайри шагьидвалзава. Мисал яз, алай йисан 3-мартдиз Ахцегь райондин Хуьруьгрин хуьре кардик квай «Люминари» центрада «Леки» фондуни химиядай кьиле тухвай олимпиадада Алина Бейтуевади 1-чка кьуна.
Адахъ мадни еке агалкьунар хьурай.
Чи мухбир
