Осман  Сарывелли (1905-1990)

Дагъустандин ашукь СтIал Сулейманаз

Сая са лежбердин алаз парталар,

Тандал чIулав чухва, ластикдин валчагъ,

Кьилел куьгьне бармак, кIвачел шаламар,

Къуьнерихъ япунжи, гъилелни теспягь.

 

Гьайиф, геж ахъайна ви уьмуьрди цуьк,

Чуьнуьх хьана пелен гьекьеда алмас.

На, эй кьуьзуь тежер дагъларин билбил,

Галатун гьисснач гьич мани ядамаз.

 

Анжах уьмуьр хьана ви мукьва сирдаш,

Кесибвили вав вил ахъайиз ганач.

Лувар тир хиялар, ви такабур кьил

Кьакьан дагьларилай гьич агъуз хьанач.

 

ЧIулав къармахраваз чеб игьтияждин

Гьикьван кесиб-куьсуьб хьана перт, сефил.

Рагъул сун гуьлуьтри, шаламри лидин,

Ви гъиляй вахчунач шаирдин гуьгьуьл.

 

Гележег яргъал я лугьун тавуна,

Эллериз багъишна на уьмуьр жуван.

Илгьамдин булахдай кьур акъатда, кьур,

Бине туштla эгер элдикай адан.

 

Са сефер хьайидаз ви чуьнгуьрдин ван

Чир жеда яргъалай ви макьам, гьава.

Вилер Физулидин вилер хьиз тир ви,

Нур аваз, куькIвенвай гъетер хьиз цава.

 

Гьи касдин девирдихъ чи галачтIа вил,

Адан гъилерикай галкIана девран.

Кьуьзуь я лугьумир рехи тирдаз кьил,

РикI кьуьзуь тахьайтIа, кьуьзуь туш инсан.

 

Шиирдиз, сенятдиз бахшна на уьмуьр,

Эбеди амукьда ви гьар са шиир.

Гьавиляй дагъвийри ви сурун кьилихъ

Кьилер агъузнава такабурлу тир.

 

Ви хци гафари, хенжелар хьтин,

Сенгерар чукIурна къанлу ягъидин.

Дагъвийрин шиирдин гъед туьхвена къе,

Лугъумир: «Кьуьзуь са ашукь кьена къе».

 

Анжах шехь тавурай дагъви стхаяр,

Абрухъ ава рекьин тийир сеняткар.

 

Элди хуьда рикIе даим адан тlвap,

КьейитIани шаир, ам бахтавар я.

Адан гуьзел чIалар, ширин манияр

Халкьдиз мидаим тир са ядигар я.

Азербайжан чІалай

 

Инаят  Махсумов (1905-1978)

Сагъ я Сулейман

 

Ви чIалар кIелайла, хьанай зун гьейран,

Эй шаир, сейли тир дуьньяда тIвар-ван.

Атай бед хабарди къарсурна зи чан:

«Кьена халкьдин шаир устад Сулейман».

 

Ван хьайи береда ихьтин са хабар,

Вилел ихтиярсуз атана накъвар,

Ажалди вегьена вални къармахар,

ТIимил амай зи рикI жез пад, Сулейман.

 

Сефил я, вун амач лугьуз, Дагъустан,

Къафкъаздин дагъларни язва къе пашман,

Ясдава чи уьлкве, ясдава Ватан,

Хьанва чи гьал-агьвал барбатI, Сулейман.

 

Ви дерт чи хурудал тагъ я даима.

Ваъ, ваъ, кьенвач шаир, сагъ я даима,

Лап кьакьан кукIуш я, дагъ я даима,

Ви чIалар я халкьдин мурад, Сулейман!

Узбек чIалай

 

Самед  ВУРГУН (1906-1956)

СтIал Сулейманаз

 

Чи бахтлувал Сулейманан гьайбат я!

Кьуьзуь касдин, вич гьич рекьин тийидай.

Ам девиррин акьул, намус-гъейрат я,

Гележегдай гележегдиз хъфидай.

Азербайжан чIалай

 

Джек  Алтаузен (1907-1942)

 

Ашукьдин чIал кьуна, амма манийрин

Ван атIудач адан хайи уьлкведа,

А манияр турараллаз женгчийрин

Жеда даим азадвилин дяведа.

Урус чIалай

 

Виктор  Гусев (1909-1944)

 

Шаир, гьатна яс уьлкведа,

Акуна чаз вун магьфеда.

Амма чаз ви сес хкведа

Тежер вичиз тай, Сулейман.

 

Ви чIалакай, хиялдикай

Магьрумиз чун ажалдилай

Алакьдач, ви камалдикай.

Авач адаз пай, Сулейман.

Урус чIалай

 

Сергей  Васильев (1911-1975)

 

Ви пIузарар — мани лагьай баркаван! —

Акьал хьана, гаф гвай рикIин дердийрин.

Билбилдин сес, вацIарин яд, манийрин

Мурз атIудач са чIавузни, Сулейман!

 

Вири крар — кткайбур ви тарифдик —

Кьиле фида. Къизилгуьлдин цуьквери

Кьада уьлкве, са чIавузни эллери

Дерт чIугвадач, магълуб хьана, гьайифдик.

Урус чIалай