Философиядин илимрин доктор, профессор. Кьве вишелай виниз илимдин кIвалахрин, гьабурукай яз кIуьд монографиядин, къецепатан уьлквейрин чIаларални акъатнавай макъалайрин автор. Мадни обществодин тIал алай ва милли месэлаяр дериндай веревирд ийизвай публицист. Мадни хайи чIалал кхьизвай, лезги литературада вичин инкар тежедай чка кьунвай, са кьадар ктабар акъуднавай писатель ва шаир. Омар Межидович Гьуьсейнов чи рикIера гьахьтинди яз амукьда.
И мукьвара ам редакциядиз вичин цIийи «Шиирралди рахазва зун зи халкьдив» ктабни гваз атанай. Ада ам ихьтин цIараралди ачухзава:
Шиирралди рахазва зун зи халкьдив,
Лугьуз адаз жуван пак тир фикирар,
Каспидилай гатIунна, лап Шагьдагъдив —
Гьикьван кIан я заз куьн, хайи жигъирар.
Адан яратмишунрин бинеда датIана куькIвена кузвай ватанпересвилин гьисс ава. Анжах гафаралди ваъ, гьакъикъатдани хайи чилин хва тир адан хци, яшар хьуналди эсиллагь къуватдай ават тийизвай фикир халкьдин кьисметдикай тир. Вичин яшдизни, акъатна физвай вахтунизни ам вичин жуьреда, философдин вилерай килигзавай. Вахт атайла, пуч жеда вири, лугьузва ада са шиирда, вахтуниз табий тушир затIни авач.
Анжах руьгьдин девлетриз чи чидач гьич я вахт, я чIав,
Гьикьван дегишвилер хьайтIан, абур гумукьзава чав.
И гафара адан уьмуьрдин принцип ава. Вичин уьмуьр ада халкьдин руьгьдин девлет артухаруниз гана. Гъиле авай йисуз чун адан 85 йисан юбилей лайихлудаказ, шад гьалара къейд ийиз гьазур хьанвай. Гьайиф хьи, а йикъав ам агакьнач. Омар Межидовичан юбилей чна, гьелбетда, къейдда, вични къенлай кьулухъни чахъ галаз амукьда. Ада, чIехи акьулдин ва бажарагъдин инсанди, тунвай яратмишунрин ирс чи халкь патал вичин метлеб квадар тийидайди я.
А.Омаров
