Вад уьлкведиз
Дагъустанди 2023-йисуз къецепатан вад уьлкведиз активвилелди хипен як ракъурна. Идакай РД-дин хуьруьн майишатдин ва недай суьрсетдин министрдин заместитель Эмин Шайхгьасанован гафарал асаслу яз, «Дагъустан» РИА-ди хабар гана.
Ада къейд авурвал, алатай йисуз Дагъустанди хипен як рекье тур уьлквейрик Азербайжан, Гуржистан, Иран, Къазахстан ва Узбекистан акатзава.
Э. Шайхгьасанован гафарай малум хьайивал, кьилди къачуртIа, 2023-йисуз куьлуь карч алай 152 агъзур гьайван экспорт авуна. ГьакI, еке карч алай гьайванар къецепатан уьлквейриз рекье тунин кьадарни артух жезва, и рекьем 62 агъзурдав агакьнава.
470 агъзурдалай виниз
Алай йисан эвел кьилелай инихъ РД-дин Яшайишдин фондуни республикадин 470 агъзурдалай виниз агьалийрин къуллугъар электронный къайдада кьилиз акъуднава. Идакай ведомстводин пресс-къуллугъди хабар гузва.
Къейдзавайвал, Яшайишдин фондуни гьар юкъуз республикадин агъзурралди агьалийриз выплатаяр тайинарзава, гьакI маса серенжемарни кьиле тухузва. ОСФР-дин муьштерийрин арада набут ксар, аялар галай хизанар ва маса агьалияр ава.
Чешмеди кхьизвайвал, СФР-дин электронный къуллугърикай менфят къачун патал «Госкъуллугъар» (www.gosuslugi.ru) порталда регистрация хьун лазим я. И кар агьалидивай вичиз мукьвал тир СФР-дин РД-да авай муьштерийриз къуллугъдай Отделенидиз ва я МФЦ-диз фена ийиз жеда.
Дагъустанвийрин фикирдалди, алай вахтунда Яшайишдин фондунин къуллугърикай виридалайни гзаф тIалабзавайбур ибур я:
СФР-ди гузвай выплатайрин ва пенсийрин кьадар тайин тир вахтунда къалурзавай справка;
дидевилин капиталдикай гьикьван аматIа къалурзавай выписка;
пенсия ва яшайишдин выплатаяр тайинарнавайди къалурзавай выписка.
Суалар арадал атайтIа, СФР-дин РД-да авай Отделенидиз (тел.: 8-800-200-03-39) зенг авуна, хабар кьаз жеда.
Дагъустанди таъминарзава
Уьлкведа келемрин кьадардин умуми гьисабдин кьудакай са пай Дагъустанда гьасилзава. Идакай, РД-дин хуьруьн майишатдин ва недай суьрсетдин министерстводал асаслу яз, «Дагъустан» РИА-ди хабар гузва.
2023-йисан нетижайралди, келемар гьасилунал гьалтайла, Дагъустан уьлкведа кIвенкIвечи чкадал хьанва. Кьилди къачуртIа, ведомстводин делилралди, уьлкведа гьасилзавай келемрин умуми кьадардикай 25 процент РД-дал ацалтзава. ГьакIни хабар гузвайвал, СКФО-да гьасилзавай келемрин умуми кьадардикай 90 процентдилай виниз Дагъустанда арадал гъизва.
Вахт тайинарнава
Дагъустандин Огни шегьерда канализация михьи ийидай тадаракар эцигдай пудратчи кархана конкурсдин бинедаллаз тайинарнава. Идакай зегьметдин ва яшайишдин рекьяй вилик финин министерстводин телеграм-каналда хабар гузва.
Кьилди къачуртIа, чешмеди къейдзавайвал, махсус программадин сергьятра аваз, уьмуьрдиз кечирмишзавай и серенжем ООО «Жильё» тIвар алай СМК-ди (строительно-монтажная компания) кьиле тухудайвал я. Хабар гузвайвал, и кIвалахдин нетижада Дагъустандин Огни шегьердин 30 агъзур агьалиди менфят къачузвай санай масаниз яд тухудай хилез талукь къуллугъар ерилубур жеда.
Чешмедин делилралди, канализацияр михьи ийидай тадаракар эцигунин кар 2026-йисуз акьалтIарун пландик кутунва.
РД-дин эцигунрин, архитектурадин ва ЖКХ-дин министрдин везифаяр вахтуналди тамамарзавайди тир Бахтияр Уллаева къейдзавайвал, и проект уьмуьрдиз кечирмишуни цин объектар экологиядин жигьетдай михьибур хьун таъминарда. Адан гафаралди, и серенжемди гьакIни экологиядин жигьетдай вири Каспий гьуьлуьн гьалар къайдадик хьунин карни хъсанарда.
Гьазурайди — Муса Агьмедов
