24-майдиз Дербент шегьердин гуьрчегдиз безетмишнавай вири школайрин гьаятра шадвилин авазринни манийрин сесер гьатнавай. Цуькверин кIунчIар ва гьар жуьре рангарин шарар гвай, дамахдин парталар алай выпускникринни мугьманрин вилера шадвал авай. ИкI, шегьердин школайра кIелунин йисан эхиримжи зенгинин линейкаяр кьиле фена.
Алай йисуз шегьерда 9 классар — 1990 ва 11-классар 534 ученикди акьалтIарзава. Шегьердин кьил Рустамбег Пирмегьамедова 8 ва 9-нумрайрин школайра кьиле фейи мярекатра иштиракна. Ада кIелунин йис акьалтIарзавай аялриз ва абурун диде-бубайриз сувар тебрикна: «Квез куь вилик чIехи мурадар эцигиз кичIе жемир. Гьихьтин четинвилер гьалтайтIани, фикирдик квай крар кьилиз акъудиз алахъ. ЕГЭ ва ОГЭ вахкунин рекье квехъ агалкьунар хьурай!».
И юкъуз шегьердин 4-нумрадин школадин выпускникриз жегьилрин уьмуьрда жезвай шад вакъиа шегьердин депутатрин собранидин председатель Гьасан Мирзоева хуш келимайралдини алхишралди тебрикна.
Школайра шадвилер гъвечIи аялри выпускникриз шиирар кIелуналди, манияр лугьуналди, муаллимриз, олимпиадайра ва конкурсрин гъалибчийриз шабагьар гуналди ва эхиримжи зенгер ягъуналди акьалтIна.
Къагьриман Ибрагьимов
