«Формирование комфортной городской среды» федеральный дережадин программа кьилиз акъудунин сергьятра аваз, Дербент шегьердин Къазимегьамед Агъасиеван тIварцIихъ галай куьчедин 9 «а» нумрадин кIвалин гьаятдин мулкар авадан ийиз эгечIнава.
25-майдиз ана кIвалахар кьиле физвай гьалдихъ галаз Дербент шегьердин кьил Рустамбег Пирмегьамедов таниш хьана.
Шегьердин администрациядин майишатдин управленидин начальникдин заместитель Этибар Исмаилова Р. Пирмегьамедоваз авур докладдай малум хьайивал, мулкар авадан авунин мураддалди, лазим авачир шейэр чукIурна, чка къайдадиз гъанва, куьчеда кузвай экверин кабель чиликай тухванва, тротуардин плитка эцигнава. Ана гьакIни цIийи куьсрияр, зирзибил вегьедай къапар, ацукьдай чкаяр жеда.
Объектдал пудратдин тешкилат «ИБ Къацу гьаят» ООО-дин 6 касдикай ибарат бригадади ва кьве улакьди кIвалахзава.
Шегьердин кьил къваларив гвай кIвалерин агьалийрихъ галаз рахана, абурун арзайриз яб гана, жавабдар инсанриз тапшуругъар гана. Ада аялрин майдандал тадаракар эцигдай кIвалахар ери аваз тухуниз кьетIен фикир гун герек тирди къейдна.
Къагьриман Ибрагьимов
