Дагъустан Республикадин Кьилин патав гвай агъсакъалрин Советдин председатель Ибрагьим Ибрагьимов кIвалахдин рекьяй СтIал Су­лей­манан райондиз мугьман хьана. Ам райондин депутатрин собранидин председатель Штибег Мегьамедханова ва «Полоса» ООО-дин векил Тажир Ярагьмедова хушвилелди кьабулна.

Районда агропромышленный комплекс авай гьалдикай, АПК вилик тухун патал уьмуьрдиз кечирмишзавай инвестпроектрикай, районда багъманчивиле, уьзуьмчивиле, малдарвиле хьанвай агалкьунрикай ихтилатар авурдалай гуьгъуьниз Ибрагьим Ибрагьимов агропромышленный объектрал фена. Райондин векилрихъ галаз ам, кьилди къачуртIа, карханада хуьруьн майи­шатдин кIвенкIвечи къайдаяр ишлемишзавай къайдайрихъ, емишар хуьдай гьамбарханадин эцигунрихъ галаз таниш хьана, хуьруьн майишат вилик тухунин мумкинвилериз къимет гана.

Ибрагьим Ибрагьимова инанмишвал къалурна хьи, муниципалитетда уьмуьрдиз кечирмишзавай инвестпроектри районда яшайишдин дурумлувал мягькемаруниз, экономикадин рекьяй гележегда мадни вилик финиз куьмек гуда.

— Районда чкадин аграрный сектор вилик тухуни агьалийриз кIвалахдин алава чкаярни арадал гъида, вири жуьрейрин бюджетриз къвезвай пулунин такьатрин кьадарни артухарда. Ибур алай аямда лап важиблу месэлаяр я, — къейдна И. Ибрагьимова.

Санлай къачурла, Ибрагьим Иб­рагьимова районда АПК авай гьалдиз, инвестицийрин проектар уьмуьрдиз кечирмишунин мумкинвилериз еке къимет гана. Ада лагьайвал, гзаф рекьерай район маса муниципалитет­риз чешне я.

Хазран  Кьасумов