Умуми гьисабдикай
Урусатдин некIедин продукциядин умуми гьисабдикай 5 процент Дагъустанди гьасилзава. Идакай «Дагъустандин экономика» телеграм-каналди хабар гузва.
Чешмеди къейдзавайвал, виридалайни гзаф и продукция Ставрополдин крайда гьасилзава — 84 процент. ГьакIни некIедин продукция арадал гъун Карачаево-Черкесиядани къайдадик кутунва (8 процент).
Хабар гузвайвал, санлай къачурла, кьуру нек ва къаймах гьасилунин кьадар Кеферпатан Кавказдин федеральный округдин регионра алай йисан сифтегьан пуд вацра виликан рекъемрилай 10 сеферда артух хьанва.
ИкI, чешмеди гъизвай делилралди, эгер 2023-йисан январь-март варцара СКФО-да 1,2 агъзур кг кьуру нек ва къаймах арадал гъанвайтIа, 2024-йисан сад лагьай кварталда и рекъем 12,1 агъзур килограммдал кьван хкаж хьанва.
100 миллион манат харжда
Дагъустанда сар гьялдай техника маса къачун патал 100 миллион манат субсидияр харжда. Идакай РД-дин Гьукуматдин Председатель А. Абдулмуслимова хабар гана.
Чиновникдин гафаралди, республикада сар гьялдай промышленный кластер тешкилзава. Адан сифтегьан паюна 8 тешкилатди иштиракдайди тестикьарнава. Абуру саналди сарикай жуьреба-жуьре затIар арадал гъидай кьуд проект кьилиз акъудзава. Хабар гузвайвал, акъудзавай метягьрин къимет, санлай къачурла, 1 миллиард манатдиз барабар жеда.
Багьа хьанва
Дагъустанда яшайишдин кIвалер тамамдиз ремонт авунай (ремонт под ключ) устIаррин къуллугърин къимет 2024-йисуз багьа хьанва. Идакай «Дагъустандин экономика» телеграм-каналди хабар гузва.
Чешмеди къейдзавайвал, «Авито Услуги» сервисдин делилралди, майдин эвел кьилерай 1 кв.м.ремонт авунин къуллугърин къимет юкьван гьисабдалди 22 агъзур манатдив агакьнава. 2023-йисан и муддатдив гекъигайла, къимет 3 процентдин хкаж хьанвайди якъин жезва.
Гьа са вахтунда республикада устIаррин ихьтин къуллугърикай менфят къачузвайбурун кьадарни артух хьанва. Амма СКФО-дин регионрин арада кIвалер ихьтин къайдада ремонт авунин къуллугъ виридалайни гзаф Ингушетиядин агьалийрин арада сейли я. Виликан рекъемрив гекъигайтIа, ахьтин къуллугъдикай менфят къачузвай кьадар 34 процентдин пара хьанва. Къейдзавайвал, и регионда 1 кв. метр ремонт авунин къимет 25 агъзур манатдилай гатIунзава.
Кабардино-Балкарияда са кв. метр ремонт авунин къимет — 18, Кеферпатан Осетияда 20 агъзур манатдилай гатIунзава.
Шазандалай гзаф
Дагъустанди алай йисан эвел кьилелай инихъ яшайишдин кIвалер ишлемишиз вахкунин кьадар вад сеферда артухарнава. Идакай «Дагъустан» РИА-ди хабар гузва.
Чешмедин делилралди, 2024-йисан январь-апрель варцара республикада 1,38 миллион кв.м яшайишдин кIвалер ишлемишиз вахканва.
Хабар гузвайвал, 2023-йисан сифтегьан кьуд вацрав гекъигайла, и рекъем, винидихъ къейднавайвал, вад сеферда гзаф я.
МФЦ-дикай менфят къачузва
2024-йисан эвел кьилелай инихъ 300-далай гзаф дагъустанвийри догазификация программада иштиракун патал МФЦ-да арзаяр ганва. Гьа са вахтунда 30 хсусиятчиди газдиз талукь «лицевой счетар» ахъаюн патал МФЦ-дин къуллугърикай менфят къачунва. Идакай «Газпром межрегионгаз Махачкала» компаниядин пресс-къуллугъди хабар гузва.
Чешмеди къейдзавайвал, виликдай Дагъустанда гьукуматдин ва муниципальный къуллугъар кьилиз акъудун патал «Газпром межрегионгаз Махачкала» ООО-дин теклифдалди газдин компанияди МФЦ-дихъ галаз махсус икьрар кутIуннай.
Компаниядин генеральный директор Ризван Мурадован гафаралди, и къайдада санал кIвалахуни кьилдин кIвалер газдин сетдик кутунин кар тади гьалда кьилиз акъуддай ва ам регьятардай мумкинвал гуда.
Гьазурайди — Муса Агьмедов
