27-майдиз РД-дин Кьил Сергей Меликован регьбервилик кваз Махачкъалада республикадин бюджетдиз къвезвай къазанжийрин кьадар артухарунин месэлайриз талукьарнавай заседание кьиле фена. Адан сергьятра аваз, экономикадин «хъендик квай» сектор винел акъудун ва бюджетдиз къвезвай къазанжийрин кьадар артухарун патал региондин зонайра арадал гъайи махсус дестейри кьиле тухвай кIвалахдин нетижаяр кьуна.
РикIел хкин, винидихъ къейд авур дестеяр Сергей Меликован теклифдалди алатай йисуз кеферпатан, кьиблепатан ва дагълух зонайра тешкилнай. Адалай инихъ йис алатнава. Дестейри кьиле тухванвай кIвалахдин нетижайрикай региондин Кьилиз РД-дин экономикадин ва мулкар вилик тухунин министрдин везифаяр вахтуналди тамамарзавай Адильхан Агьмедова хабар гана.
Чиновникдин гафарай малум хьайивал, 2023-йисуз шегьерринни районрин бюджетриз, санлай къачурла, 14,3 миллиард манат пулдин такьатар атана. Виликан йисав гекъигайтIа, и рекъем 3 процентдин хкаж хьанва. Алай йисан январь-апрель варцара муниципалитетрин бюджетриз атанвай пулдин такьатрин кьадарди 4,4 миллиард манат тешкилнава. 2023-йисан гьа и девирдив гекъигайла, якъин жезвайвал, такьатрин кьадар 23,8 процентдин артух хьанва.
А.Агьмедова, 4 вацран нетижаяр фикирда кьуна, бюджетриз виридалайни пара пулдин такьатар агакьнавай шегьерринни районрин тIварар кьуна. Абурун арада Буйнакск, Каспийск, Дагъустандин Огни шегьерарни Буйнакскдин, Унцукуль, Шамилан, Ахцегь районар ава.
Сергей Меликова бюджетдиз къвезвай къазанжийрин кьадар артухарун патал чешнелу кIвалах кьиле тухунай зонайрин дестейрик квай пешекарриз сагърай лагьана ва и хиле авай гьялна кIанзавай бязи месэлаяр къейдна.
«Карчивилел машгъул жезвайбур регистрация авунилай, чиновникрилай гатIунна, гьукумдин вири дережайрин органрин къуллугъчийрал хкатдалди вирида вахт-вахтунда налогар гунилай яшайишдинни экономикадин программаяр кьилиз акъуддай алава мумкинвилер аслу я. И кIвалах давамарна кIанда. Чаз къе нетижа герек я. Маса рехъ авач», — лагьана С.Меликова.
Чи мухбир
