29-майдиз Дагъустан Республикадин Кьил Сергей Меликова  РД-дин Халкьдин Собранидиз вичин Чар кIелна. Мярекат меркездин Дуствилин кIвале кьиле фена. Зал сиве-сивди инсанрив ацIанвай. Иштиракчийрин арада Федеральный Собранидин, Госдумадин векилар, РД-дин Халкьдин Собранидин депутатар, республикадин гьукумдин ва муниципальный органрин, федеральный къурулушрин, карханайрин руководителар, СВО-дин иштиракчияр, образованидин, илимдин, культурадин, спортдин деятелар, агъсакъалар ва жегьилар авай.

Республикадин Кьили регионда арадал атанвай сиясатдин, экономикадин, яшайишдин гьалариз дуьзгуьн къимет гана. Ада республикадин вилик акъвазнавай важиблу везифаяр ачухарна, жуьреба-жуьре къурулушри, минис­терствойри, ведомствойри, муниципалитетри рехъ гузвай кимивилерал ва кIвалахар кьулухъ язавай гъалатIрал фикир желбна.

— Гьуьрметлу депутатар, дагъустанвияр! — рахаз эгечIна Сергей Меликов.- За къе квез, Дагъустандин Конституция­ди ганвай векилвиликай менфят къачу­на, республикадин вилик акъвазнавай къенин ва пакадин везифайрикай суьгьбетзава. 2022-йисан февралдилай чи уьл­кведин уьмуьрда еке дегишвилер хьанва. Украинадин миллетбазрин вилик­ пад кьун патал дяведин махсус серенжем­ кьиле тухузва. Ана дагъустанвийри баркаллувилелди иштиракзава ва Ватандин вилик пак тир буржи намуслувилелди, викIегьвилелди кьилиз акъудзава.

ЦIи Россиядин Президентдин сечкияр кьиле фена. Дагъустанвийри чпин патай адаз авай кIанивал, мад сеферда адаз ихтибар авуналди, сес гуналди, къалурна. Чи Президент Дагъустандив эгечIзавай гьални тарифдайди я. Ада Россиядин Федерация 2030-йисалди виликди фидай программа тайинарнава. Ана уьлкве экономикадин, яша­йишдин вири хилерай виликди тухунин везифа эцигнава. Чнани адан бинедаллаз кIвалах тешкилзава.

Региондин Кьил мад сеферда махсус серенжемдихъ галаз алакъалу месэладал хтана. Ада къейд авурвал, серенжемдин вири иштиракчияр алай аямдин игитар я. Абур гъалибвал гваз ва сагъ-са­ламатдиз хтун чи мурад я. Сергей Меликова серенжемда викIегьвилелди иштиракай ва Россиядин Федерациядин Игит лагьай виниз тир тIварцIиз лайихлу хьанвай 11 дагъустанвидин тIварар ­кьуна.

— Абур ва серенжемда иштиракзавайбур, къе и залда ацукьнавай кьегьалар халис игитар, чи ва Россиядин дамах я,- лагьана Дагъустандин регьберди.

Сергей Меликова махсус серенжемдин иштиракчийриз, абурун хизанриз, хирер сагъар хъийизвайбуруз республикади гузвай куьмекдикай, абурун гьа­къиндай чIугвазвай къайгъударвиликайни лагьана.

Региондин Кьили республика кIеве гьатай 1999-йисан вакъиаярни рикIел хкана. Ада къейд авурвал, гьа йисалай уьлкведа ватанпересвилин месэла сад лагьай чкадал акъатна. Тарихдин метлеб авай вакъиаяр рикIел хуьн лазим я. Алай йисан сентябрдиз республикада Игитрин фестиваль кьиле тухуда. Ана международный бандитрин тешкилат­рихъ галаз женг чIугурбуруни, СВО-дин кьегьалрини иштиракда.

Сергей Меликов дагъустанвийрин яшайишдин, агьваллувилин месэладал­ кIевелай акъвазна. Ада лагьайвал, гьар са дагъустанвидиз лайихлувилелди, агь­валлувилелди яшамиш жедай ихтияр­ ава. Абуруз гьа ихьтин шартIар тешкилун­ни лазим я. Амма алатай йисарин коррупциядин хъендик кумай, лутувалзавай, государство алдатмишзавай ксарин, карчийрин, бизнесменрин чIуру гьерекатар себеб яз, республикадин бюджет миллионралди такьатрикай магьрум жезва.

Кьве сятни зура авур рахунра Сергей Меликова республикадин вири хилериз талукь агалкьунрикай, чарасуз гьялна кIанзавай месэлайрикай, минис­терствойри, ведомствойри, муниципалитетри рехъ гузвай нукьсанрикай, гьа­къи­къи делилар, мисалар гъиз, лагьана. Регьберди промышленностдин, хуьруьн майишатдин, туризмдин, спортдин­ коллективри, яшайишдин хилерин къул­лугъчий­ри къазанмишнавай агалкьунрал шадвална. Гьа са вахтунда ада электроэнергиядин, газдин, транспортдин, чи­ле­рихъ галаз алакъалу, медицинадин, об­разованидин, агьалийриз къуллугъдай­ хилера рехъ гузвай кимивилерикай, нукь­санрикай наразивилелди лагьана.

Вичин рахунра Сергей Меликова 2030-йисалди федеральный, республикадин бюджетрай ахъайзавай ва инвес­торрин такьатралди республикада эцигиз гъиле кьазвай имаратрикай, дара­мат­рикай лагьана. Санлай къачурла, рес­публикадин агьалияр патал лап важиблу и проектриз 150 млрд манатдилай виниз пулар серфда.

Нариман Ибрагьимов