26-майдиз Кьасумхуьрел Ахцегьрин хуьряй тир машгьур меценат Нариман Гъазалиеван пишкешар патал «А ну-ка, девушки» лишандик кваз Дагъустандин халкьарин медениятдиз, адетриз талукьарнавай конкурс кьиле фена.
Ана Агъул, Дахадаеван, Докъузпара, Дербент, Кьурагь, Мегьарамдхуьруьн, Рутул, СтIал Сулейманан, Табасаран, Хив районрин командайри иштиракна.
Рушарин дестейри са шумуд номинациядай — «Милли кьуьлер», «Хайи чилин тарих», «Дагъви дишегьлийрин милли парталар» — чпихъ авай алакьунар, чирвилер къалурна. Саки вири районрин командаяр конкурсдиз вини дережада аваз гьазур хьанвай. И кар жюридин членрини къейдна. Къейд ийин хьи, рушари къалурай нумрайриз къимет гайибурун арада РД-дин информациядин ва печатдин Агентстводин руководителдин сад лагьай заместитель Наида Мегьамедова, Дагъустандин дишегьлийрин Союздин председатель Интизар Мамутаева, «Лезги газетдин» кьилин редактор Мегьамед Ибрагьимов, «Дагъустандин дишегьли» журналдин кьилин редактор Хамис Шамилова, РД-дин депутат Шамил Омарован куьмекчи Алигалбац Гьуьсейнов ва СтIал Сулейманан райондин аялрин яратмишунрин кIвалин директор Нариман Османов авай.
Конкурсдин нетижада 1-чка — Мегьарамдхуьруьн, 2-чка СтIал Сулейманан районри кьуна. 3-чка Табасаран ва Рутул районрин командайри чпин арада пайна.
Гъалибчийриз ва вири иштиракчийриз дипломар, сертификатар, пулдин пишкешар гана. Къейд ийин хьи, конкурс кьиле тухун патал пулдин такьатар Нариман Гъазалиева чара авунвай.
Чи мухбир
