Дагъустандин Кьилин ва Гьукуматдин Администрациядин Руководитель Алексей Гьасанов алай къуллугъдилай элячIна. Республикадин Кьил Сергей Меликова вичин телеграм-каналда хабар гайивал, ада кIвалах дяведин махсус серенжем (СВО) кьиле физвай зонада давамарда.

«Къе зун патал важиблу къарар кьабулна. За Алексей Гьасанован патай ам РД-дин Кьилин ва Гьукуматдин Администрациядин Руководителдин къуллугъдилай элячIуниз талукь арза кьабулна…

Алексей Гьасанова къуллугъдин рекьяй кIвалах дяведин махсус серенжемда иштиракзавай подразделенийра давамарда. Ада гъалибвал мукьва авун патал гьанани кIвалахдин рекьяй вичин виридалайни хъсан ерияр къалурдайдахъ зун инанмиш я», — кхьенва С. Меликова.

Дагъустандин Кьилин гафаралди, А. Гьасанов идалай вилик са шумуд сеферда СВО-диз физ гьазур хьанай. «СВО гатIунайдалай инихъ Алексей Гьасанова са шумуд сеферда завай вич махсус серенжем кьиле физвай зонадиз фин патал къуллугъдикай азад авун тIалабнай…», — алава хъувуна С. Меликова.

Республикадин Кьилин Администрациядин кьиле вахтуналди Махач Омаров тайинарнава. Талукь къарардал С. Меликова къул чIугуна. Виликдай М. Омарова РД-дин Кьилин ва Гьукуматдин Администрациядин Руководителдин сад лагьай заместитель яз кIвалахзавай.

Чи мухбир