1-июлдилай
Дагъустандин целди таъминардай ва яд санай-масаниз тухудай хиле Сад тир оператордин генеральный директор Мегьамедгьажи Шапиева ЦУР-дин ачух эфирда къейд авурвал, алай йисан 1-июлдилай, ЖКХ-дин къуллугърай гьакъи гудайла, пенсионерривайни чпиз яшайишдин рекьяй тайин тир кьезилвилер авай агьалийривай комиссиядин пул кьадач.
Адан гафаралди, виликамаз кьунвай делилралди, ихьтин кьезилвал тайинардай ксарин сиягьдик винидихъ тIвар кьунвай кьве категориядин агьалияр акатда. Амма комиссиядикай азад авунин къайда (регламент) ва гьихьтин документар вугун лазим ятIа, гьелелиг тайин туш.
Мегьамедгьажи Шапиева хиве кьурвал, и кардин гьакъиндай герек тир малумат мукьвал девирда гуда. Адан гафаралди, и месэлайрин жигьетдай агьалияр жезмай кьван гзаф хабардар ийида.
Саки 12 миллиард манат
Дагъустанвияр электроэнергиядалди таъминарунин кIвалахдин дурумлувал хкажун патал 2024-2026-йисара 11,8 миллиард манатдилай гзаф пулдин такьатар чара ийида. Идакай «Дагъустан» РИА-ди хабар гузва.
«Россети Северный Кавказ» компаниядин генеральный директор Р. Левченкодин гафаралди, программадин сергьятра аваз, республикада энергиядин вишелай виниз объектар цIийи кьилелай туькIуьр хъийида.
Ада гьакIни 2024-2025-йисарин зулунни хъуьтIуьн муддатдиз республикадин электросетдиз талукь комплексный гьазурвал акунин жигьетдай кьиле тухудай серенжемрикайни хабар гана.
Малум хьайивал, энергетикри 110 КВ-дин 9 подстанциядал къуватдин трансформаторар дегишарун ва эцигунин кIвалахар кьиле тухун, Махачкъалада распределительный 33 ЛЭП цIийикIа туьхкIуьрун, гьакIни гьавадай тухванвай 46 ЛЭП къайдадиз хкун пландик кутунва. Къейдзавайвал, и серенжемриз саки 1,5 миллиард манатдив агакьна харжияр акъатда.
Гьа са вахтунда «Дагъустандин экономика» телеграм-каналди кхьизвайвал, 2023-2024-йисарин зулунни хъуьтIуьн муддатдин технический серенжемар кьиле тухун патал 1,7 миллиард манатдилай виниз пулдин такьатар чара авунай.
Гьазурайди — Муса Агьмедов
