Дагъустандин халкьдин шаир СтIал Сулейманан юбилейдин сергьятра аваз, Сулейман Керимован хизанри неинки Махачкъалада адан тIварцIихъ галай парк цIийикIа туькIуьр хъийизва, гьакIни чIехи шаирдин ирс машгьур авун патал маса серенжемарни кьиле тухузва. Мисал яз, 18-майдиз Керимоврин хизанрин такьатрихъ Урусатдин 1100 шегьердин куьчейра авай рекламайрин кьуларал СтIал Сулейманан суьрет эцигна.
СтIал Сулейманан 155 йисан юбилейдиз талукьарна, «Дагъустан» РГВК-ди кьилдин фильм гьазурна. РД-дин туризмдин ва халкьдин художественный сеняткарвилерин министерстводи Дагъустанда шаирдин юбилейдиз бахшнавай туризмдин кьилдин маршрут арадал гъанва. Аник шаирдин КIвал-музей, Алкьвадар Гьасанан музей, Кьасумхуьруьн 17 тагъдикай ибарат муьгъ ва маса чкаяр акатнава.
Футболдин «Динамо» (Махачкала) клубдини СтIал Сулейманан юбилейдиз талукьарнавай серенжемра иштиракна. ИкI, команда футболдин «Родина» клубдихъ галаз къугъун патал майдандиз Дагъустандин халкьдин шаирдин шикил алай футболкаяр алаз экъечIна.
«Лезги газет»
