Алатай йисан рекъемрив гекъигайтIа, цIи Дагъустанда информатикадай ЕГЭ вахкуз кIанзавайбурун кьадар 14 процентдин артух хьанва. Республикада саки гьар цIуд лагьай школьникдихъ и предметдай имтигьан вахкудай ният ава. Идакай РД-дин образованидин ва илимдин министр Яхья Бучаева хабар гана.
Министрдин гафаралди, цIи информатикадай Дагъустанда саки 1200 школьникди ЕГЭ вахкуда. Ада къейд авурвал, и предметдай имтигьан вахкузвайбурун кьадар гзаф хьун гьам Урусатда, гьамни вири дуьньяда информациядин технологийрин хилен пешеяр машгьур хьунихъ галаз алакъалу я.
РикIел хкин, 20-майдиз РД-дин Кьил Сергей Меликова цIи Дагъустанда школьникри ЕГЭ вахкунин месэлайриз талукьарнавай кьилдин совещание кьиле тухвана. Къейд ийин хьи, алай йисуз республикадин мектебра 12 агъзурдалай виниз аялри ЕГЭ вахкуда. И имтигьан вахкун патал дагъустанви школьникри виридалайни пара биология, химия, обществознание, математика ва тарих предметар хкязава.
Гегьеншдиз РД-дин Кьилин сайтдай кIелиз жеда.
Чи мухбир
