Дагъустандин халкьдин шаир СтIал Сулейманан юбилейдин сергьятра аваз, алатай гьафтедин эхирра Махачкъаладани шаирдин хайи хуьре чIехи мярекатар кьиле фена. И макъалада чун XX асирдин Гомер дидедиз хьайи югъ цIи Дагъларин уьлкведа гьикI къейднатIа, гьадакай рахада.
17-майдиз республикадин меркезда, шаирдин тIварцIихъ янавай паркуна, адан гуьмбетдин патав шадвилин митинг кьиле фена. СтIал Сулейманан экуь къамат рикIера хуьниз талукьарнавай и мярекатда РД-дин Кьил Сергей Меликова, Халкьдин Собранидин Председатель Заур Аскендерова, республикадин гьукумдин органрин, муниципалитетрин администрацийрин векилри, яратмишдай интеллигенцияди, шаирдин эсеррал рикI алай цIудралди дагъустанвийри иштиракна. Фадлай СтIал Сулейманан гуьмбетдин патав ихьтин дережадин мярекат кьиле фенвачир.
И юкъуз цIийикIа туькIуьр хъийизвай паркунин мулкара халис сувар тешкилнавай. Дагъустандин милли театррин артистри чка-чкадал хайи чIаларал СтIал Сулейманан шиирар кIелзавай, ктабрин выставкайри инсанрин фикир желбзавай, Махачкъаладин аялрин яратмишдай мектебрин тербиячийри XX асирдин Гомеран суьретар чIугвазвай…
Митинг гатIундалди вилик Сергей Меликова ва амай иштиракчийри Хасбулат Аскар-Сарыджади арадал гъанвай СтIал Сулейманан гуьмбетдал цуьквер эцигна. Республикадин Кьили къейд авурвал, СтIал Сулеймана советрин эдебият вилик финик кутунвай пай екеди я. Ам мадни гегьеншдиз ахтармишунин, чирунин игьтияж ава. Гьа и кардихъ галаз алакъалу яз, шаирдин юбилейни республикадин дережада аваз къейдзава.
«Родопдин бульвардин, шегьердин багъдин ва СтIал Сулейманан тIварцIихъ галай сквердин мулкар сад авуна, чIехи шаирдин тIварцIихъ галай парк арадал гъунин жигьетдай Махачкъаладин администрацияди кьабулнавай къарар, зи фикирдалди, дуьзди я. Идалай гъейри, ина шаирдин сурни ава. СтIал Сулейман халкьдин арадай акъатна ва гьамиша адаз мукьва яз амукьна», — лагьана Сергей Меликова.
Парк цIийикIа туькIуьр хъувуниз акъатзавай вири харжияр чи халкьдин кьегьал хва Сулейман Керимова вичин хивез къачуна. ЦIийи паркуна фонтанни кардик акатда ва ам иниз ял ягъиз къвезвайбурун фикир желбдай халис безекдиз элкъведа. ЦIийикIа туькIуьр хъувунин кIвалахар тамамдиз алай йисан эхирралди акьалтIардайвал я. Сергей Меликова чIехи шаирдин ирсинив еке къайгъударвилелди эгечIунай Сулейман Керимоваз вири дагъустанвийрин патай сагърай лагьана.
С.Меликова шаирдин бажарагъдин гегьеншвал къейдна:
«Вирисоюздин писателрин сад лагьай съезддал СтIал Сулеймана Максим Горькийдиз ахьтин таъсир авуна хьи, уьлкведин машгьур писателди адаз «XX асирдин Гомер» тIвар гана. «Сулеймана хьтин шииратдин жавагьирар арадал гъиз алакьзавай инсанар хуьх!», — рикIел хкана С.Меликова а чIавуз М.Горькийди лагьай гафар…
«Дагъустанви шаиррикай гьеле аял чIавалай заз ван хьайи сад лагьай шаир СтIал Сулейман тир. Ахпа заз Расул Гьамзатов, Фазу Алиева чир хьана, абурун ктабарни чапдай акъудна. И сеферда Дагъустандиз къведайла, за жуван дустариз икI лагьана: «Зун СтIал Сулейманан патав физва». Заз и тIвар элкъвена мад сеферда чи патав хтана кIанзава. Гьар са чIехи шаир адан халкь патал тайин са тарс хьиз я. СтIал Сулеймана чаз ганвай виридалайни кьилин тарс Ватандихъ рикIин сидкьидай авай кIанивал я. Ам, Пушкин хьиз, вири девиррин шаир я», — лагьана гуьгъуьнлай рахай Урусатдин писателрин Союздин председателдин сад лагьай заместитель Геннадий Иванова.
Мярекатдал гьакIни Махачкъаладин мэр Юсуп Умавов, Дагъустандин писателрин Союздин председатель Марина Колюбакина, РФ-дин журналистрин Союздин Дагъустанда авай отделенидин председатель, «Лезги газетдин» кьилин редактор Мегьамед Ибрагьимов рахана. Абуру СтIал Сулейманан яратмишунрикай чпин фикирар лагьана ва шаирдин юбилей республикадин дережада аваз къейд ийидай къарар кьабулунай Сергей Меликоваз чпин разивал къалурна.
СтIал Сулейманан хизандин патай митингдин иштиракчийрин вилик эхирдай адан хтул Мусайиб Стальский рахана.
«СтIал Сулейман ачух, къени инсан тир. Ада инсанриз анжах шадвал пайзавай. Гзаф миллетар яшамиш жезвай Махачкъалада адан тIварцIихъ галай ихьтин парк хьун кьетIен кар я. Къуй Каспийдин къерехдал, и иер тарарин хъенрик, вири дагъустанвийри зи чIехи бубадин берекат гьиссрай», — лагьана ада.
17-майдин нянихъ, сятдин 5-даз, Урус театрдин чIехи залда СтIал Сулейманан 155 йисан юбилейдиз талукьарнавай межлисни кьиле фена. Ам РД-дин Халкьдин Собранидин Председатель Заур Аскендерова ачухна. Театрдин зал тамамдиз ацIанвай. И карди дагъустанвийри СтIал Сулейманан ирсиниз ийизвай еке гьуьрметдин гьакъиндай шагьидвалзава.
Агьмед Магьмудов
