РД-дин Россельхозцентрадин пешекарри республикадин лежберриз цазвай тумарин еридин месэладив жавабдарвилелди эгечIуниз эвер гузва, гьикI лагьайтIа, тумарин еридилай техилдин ва пахладин жинсинин набататрин гележегдин бегьердин винизвал ва ерилувал аслу я.
Идарадин пресс-къуллугъди хабар гузвайвал, республикадин бязи КФХ-ри цазвай тумарин ери ахтармишунин месэладиз лазим тир кьадар фикир гузвач.
«Тум ахтармиш тавурла, ам патал зиянкаррикай хуьдай дарманар дуьздаказ хкягъун, и ва я маса чиле цадай кьадар ва тумар цун патал бакара къведайбур ятIа чирун мумкин кар жезвач. Виниз тир бегьерлувал таъминарун патал анжах тамамдаказ ахтармишнавай, абурук азарар квачирди шагьадатнамайралди сертификат тестикьарнавай тумар цун важиблу я», — къейднава хуьруьн майишатдин центрадин малуматда.
РикIел хкин, Дагъустанда гьар йисуз 40 агъзур гектардилай гзаф чилер майвайрин культураяр цун патал ишлемишзава. И кар патал фермерриз, санлай къачурла, тахминан 1,5 тонндин кьадарда аваз тумар лазим я. Гьа са вахтунда, республикади вичин игьтияжар тамамарзава — Дагъустандихъ техилдин ва пахладин жинсинин набататрин кьитвал авач, республикади вилик гьатта маса регионарни тумаралди таъминардай макьсад эцигнава.
РД-дин Россельхозцентради гьакIни хабар гузвайвал, 2023-йисуз идарадин пешекарри республикадин 13 къелемлухда ципицIрин 7,9 миллион къелем ахтармишнава (гьам чпин дувулар галайбур, гьамни къелем ганвайбур) ва шагьадатнамаяр ганва. Им 2022-йисан кьадардилай 35 процентдин гзаф рекъем я. Къелем гун патал ишлемишзавай бязи набататар республикадин мулкунал гьасилзавачир, неинки къунши регионрай, гьакI къецепатан уьлквейрайни гъизвай.
Республикадин емишрин къелемрин 6 къелемлухда емишрин ва хвехверин культурайрин 1,325 миллион къелем (2022-йисан кьадардилай 34 процентдин гзаф) ахтармишнава, абурукай 312,6 агъзур къелем къене куьлуь цилер авай емишринбур (ичер, чуьхверар ва мсб.), 180,2 агъзур — цил авай емишринбур, 823 агъзур — хвехверинбур ва 10 агъзур къелем субтропикрин жуьредин емишринбур я. Санлай къачур кьадардикай 307,2 агъзур къелем (2022-йисандалай 56 процентдин гзаф) гьакIни виниз тир бегьерлувилин багълар патал ишлемишиз жедайбур тир.
Жасмина Саидова
