23-25-майдин йикъара Каспийск шегьердин «Анжи-арена» стадиондал  Рос­­сиядин жинсинин лапагрин ва цIе­гьерин выставка 24 лагьай сеферда  кьиле фида. Идакай чаз РД-дин хуьруьн майишатдин ва недай суьрсет­дин  министерстводин пресс-къуллугъди ха­бар гузва.

Йиса садра кьиле тухузвай и мярекатдин тешкилатчияр  Россиядин Федерациядин хуьруьн майишатдин министерство, Дагъустан Республикадин Гьукумат ва хипехъанрин милли Союз я. Идаради хабар гузвайвал, РД-дин хуьруьн майишатдин ва недай суьрсетдин минис­терстводи «Хипехъанрин мил­ли Союз» НО-дихъ ва «ФАНЦ РД»  ФГБНУ-дихъ галаз санал выставкада иштиракдай фикир авай (арзаяр ганвай) майишатрикай ибарат  сиягь  гьар юкъуз цIийи хъийизва. ИкI, эхиримжи делилралди, выставкада иштиракунин ният авайдакай уьлкведин 10  региондай (Астрахандин, Волгограддин, Ростовдин, Ивановодин ва Калининграддин областар, Дагъустан, Калмыкия, Кабардино-Балкария республикаяр, Краснодардин, Ставрополдин краяр) тир 66 майишатди (абуру 81 экспо­зиция ачухда) ва «ДАМАТЕ» компания­ди малумарнава. Идалайни гъейри,­ уьлкведин 15 регионди­ (Адыгея, Алтай, Башкирия, Ингу­шетия, Къарачаево-Чер­­кесия, Кефер­патан Осе­тия­­-Алания, Татарстан, Ты­­­ва, Чечня, Крым, Карелия­, Мордовия, Херсондин рес­публикайри­, Забай­калье­дин­ крайди, гьакI­ни Белоруссияди выс­тавкада, чпин гьайванар гъун тавуна, иштиракдай ният авайдакай хабар ганва.

Къейдзавайвал, выс­тав­када иштиракун патал­ Федерациядин Советдай, РФ-дин хуьруьн майишатдин ва промышленностдинни алишверишдин министерствойрай делегацияр­ атун гуьзлемишзава. Идалайни гъейри, мярекатда Россиядин алимри, илимдин, образованидин ва жемиятдин тешкилатри, бизнесдин, хипехъанвилин ва цIегьерхъанвилин суьрсет гьялунин карда иштиракзавай карханайрин векилри иштиракдайвал я.

Пуд юкъуз давам жедай выставкадал алаф патал ишлемишзавай чилерин ерилувал хкажунин рекьяй авай мумкинвилер, ветеринариядин дарманар, зоотехникадин хиле меслятар, малдарвилин  хиле рекъемрин программайрин продуктар, сар гьялунин цIийи технологияр майдандиз акъудда, лапагрилай сар тунин  устадвал хкаждай мастер-классар тешкилда.

Къенин йикъан делилралди, уьл­кведин 4 субъектди  (Дагъустан, Кабар­дино-Балкария ва Калмыкия республика­яр, Ставрополдин край), Россиядин Фе­дера­циядин халкьарин культура ва адетар раиж авун патал, манияр ядай ва кьуьлердай ансамбларни желб авуналди, регион­рин милли майданар ачухун пландик кутунва.

РД-дин Минтуризмди выставкадал республикадин халкьарин художественный сеняткарвилерихъ, Дагъустандин хипехъанвилел машгъул жезвай халкьарин (аваррин, даргийрин, кьумукьрин, лезгийрин, лакрин, урусрин ва ногъайрин) яша­йишдин кьетIенвилерихъ галаз таниш же­дай майданар ачухда. Абурун сергьят­ра аваз, хипехъанвилин хилен суьрсетдикай гьазуриз жедай шейэр (кIуртар, гамар, халичаяр, чивекар, чантаяр ва икI мад) майдандиз акъудда, абур гьазуриз, гьа жергедай­ яз гам храз чирдай­ мумкинвал жеда. Выс­­­тав­ка­дин мугьманривай­, ха­бар­ гузвайвал, ахалтеки жин­синин балкIанриз, девейриз ва маса гьайванриз килигиз, рес­публикада гьазурзавай суьрсет ахтармишиз, тIуьнрин дад акваз жеда.

Мярекатдин сергьят­ра аваз, лапагрин якIалди къене­па­тан ва къецепатан­ ба­за­­рар таъминарунин, сар гьасилунин ва абур уьл­­кведин парча храдай кар­ха­найриз маса­ гунин, гьакIни са жерге­ маса месэ­лайриз талукь илимдинни теж­ри­бадин­ кон­фе­рен­ция, элкъвей столар кьиле туху­да.­

РД-дин хуьруьн майишатдин ва недай суьрсетдин министерстводи хипехъан­вилин, малдарвилин месэладал машгъул ва я и месэладиз итиж ийизвай агьалийриз выставкадиз мугьман хьуниз эвер гузва.  Къейд ийин, са йис идалай вилик аниз 16 агъзур кас атанай.

Жасмина Саидова