Дагъустандин мулкунал багълари тахминан 30 агъзур гектар чил кьунва. Идакай 22 агъзур гектар бегьердал атанвайбурук акатзава, хабар гузва РД-дин хуьруьн майишатдин ва недай суьрсетдин министерстводи. 4,1 агъзур гектар чилер алай аямдин  виниз тир бегьерлувилин багълари кьунва.

Эхиримжи йисара республикада цIийи багълар арадал гъунин рекье активнидаказ кIвалах кьиле тухузва. Нетижа яз, гьасилзавай емишрин ва мерейрин кьадардал гьалтайла, Дагъустан кIвен­кIвечи пуд региондик акатзава.

Бегьердал атанвай багъларин майданрал гьалтайла, малум хьайивал, Мегьарамдхуьруьн рай­он алай вахтунда сад лагьай чкадал ала — 2 агъзурни 726 гектар.­ Емишрин виридалайни­ еке бегьер ина 2023-йисуз кIватIна — 40 агъзур тонн. Санлай къачурла, 2010-2024-йисарин вахтунда Мегьарамдхуьруьн рай­ондин мулкунал­ 2 агъзур гектардилай гзаф цIийи багълар кутунва. И жигьетдай адалай вилик анжах­ СтIал Сулейманан район ква. Виниз тир бе­гьерлувилин багълар ина тахминан 600 гектар чилел кутунва. Эхиримжи йисара  ина инвесторар желб авун патални шартIар тешкилнава. «Гьасилзавай суьрсетдин кьадар ар­тухарунин рекье им важиблу кам я. Дагъустандихъ и жигьетдай еке мумкинвилер ава. Эхиримжи  4 йисан вахтунда республикада 5,3 агъзур гектарда цIийи багълар кутунва, абурукай 200 гектар пIинийрин къелемар цанвай чкаяр я», — къейдзава министерстводин векилди.­ Ада гьакIни хабар гайивал, къене цил авай емишрин бегьердал гьалтайла, — 87 агъзур тонн — Дагъустан Россиядин регионрин­ арада сифте чкадал ала. Тежрибади тес­тикьарзавайвал, рес­публикадихъ неинки и агалкьунар хуьдай, гьакIни производ­ст­водин кьадар артухардай мумкинвал ава.

2024-йисан 1-кварталдин нетижайралди, министерстводи хабар гузвайвал,­ Дагъустанда гьасилзавай хуьруьн майи­шатдин суьрсетдин кьадар 2023-йисан­ дережада ама. Идакай Се­веро-Кав­каз­статди хабар гузва.  Гьа са вахтунда маса республикайрилай  и рекье са кьадар виликди физ алакьнава.

Мисал яз, Ставрополдин крайда алай йисан 3 вацра хуьруьн майишатдин 29,8 миллиард манатдин къимет авай суьрсет гьасилнава (алатай йисандалай 5% гзаф). Кабардино-Балкарияда и делилди­ 7,4 миллиард манат (3,8 процентдин гзаф) тешкилзава. Гьа са вахтунда Да­гъус­­танда гьасилай хуьруьн майишатдин­ суьрсетдин кьадар 2023-йисан кьадарда аваз ама ва 13,2 миллиард манатдив агакьнава. Санлай къачурла, Кеферпатан Кавказда 70,3 миллиард манатдин хуьруьн майишатдин суьрсет гьасилнава.

Жасмина  Саидова