Жемият, инсанар патал гьи пеше гзаф важиблуди я лагьай суалдиз тайин жаваб гуз хьун мумкин туш. РикIел Лезги Няметан шиирдин цIарар къвезва:

… ТиртIа са ферли кIвалерин устIар,

Хкаждай виниз зегьметди зи тIвар…

Гзаф гудай за ватандиз хийир,

Гъилер — фяле, рикI кIвалах хьанайтIа…

Хъсан, герек пешейрин сагьибрин арада, гьелбетда, медицинадин хиле зегьмет чIугвазвай къуллугъчийрини важиблу чка кьазва. И йикъара за кIвалахзавай «Куьредин хабарар» газетдин редакциядиз мугь­ман хьайи зегьметдин ветеран, Кьурагь райондин КIирийрин хуьряй тир Батман Р­агьимова зи фикирриз къуват хгана. Ада заз СтIал Сулейманан райондин центральный больницада духтур-хирург яз кIва­лахзавай Мегьамедшериф Сулейманович Гьасанбего­вакай алхишдин, рази­вилин келимаяр гзаф лагьана, адакай газетдиз макъала кхьин тIалабна.

— Кефсуз яз, зун азарханада къатканвайла, инанмиш хьайивал, Мегьамедшериф Сулейманович вичин пешедал рикI алай, дерин чирвилер авай хирург, рикI михьи инсан я, — лагьана Б. Рагьимова. — Ада ягъай рапарикай, гайи дарманрикай хьиз, заз ва захъ галаз палатада къатканвай амай азарлуйризни хирургдин ширин мецикай, кьезил­ гъиликай, хуш рафтарвиликайни куьмек хьана.

Гьелбетда, жуваз лап къени къилихдин инсан, дерин чирвилер авай пешекар яз чизвай Мегьамедшериф Гьасанбеговакай ихьтин хуш келимаяр лугьуни зун мягьтеларнач, адакай разивилин келимаяр  чаз гзаф маса инсанривайни ван жезва, газетдиз чухсагъулдин чарарни кхьизва.

Больницадиз фейила, малум хьайивал, Мегьамедшериф духтур военкоматда армиядин жергейриз тухуз эвер ганвай жегьилрин сагъламвал ахтармишунал машгъул тир. КIвалах куьтягьайдалай гуьгъуьниз чаз адахъ галаз ихтилатар ийидай мумкинвал хьана.

Мегьамедшериф (районда адаз Мегьамедшафи лугьузва) Сулеймановичан ери-би­не Хив райондин Дардархуьр я. Юкьван­ школа акьалтIарай дагъви гада гъвечIи чIа­ва­лай вичин рикIе авай мурад кьилиз акъу­дун патал Дагъустандин медицинадин ­ин­ститутдин хирургиядин факультетдик экечI­на. Студентвилин йисар акуна-такуна акъат­на.

М. Гьасанбегов Татарстандин меркез Ка­зань шегьердиз ракъурна. Лезги хци, жегьил пешекарди ана центральный больницада хирург яз са шумуд йисуз кIвалахна, хъсан тежриба къачуна.

1991-йисалай инихъ Гиппократан кьинез вафалувал къалурзавай Мегьамедшериф духтурди, винидихъ къейднавайвал, СтIал Сулейманан райондин ЦБ-да зегьмет чIугвазва. Адан патав, сагъламвал мягькемар хъийиз, инсанар неинки чи, гьакIни Кьурагь, Хив, Мегьарамдхуьруьн, Дербент ва  маса районрайни къвезва. И сир чаз М. Гьасанбеговахъ галаз санал кIвалахзавай юлдашри ачухна. Абуру алава хъувурвал, Мегьамедшерифан кIвалахдин вахт суткада 24 сятиникай ибарат я.

ЦРБ-диз фейила, чна хирургиядин отделенидин палатайра къатканвай са шумуд касдихъ галазни ихтилатар авуна. Виридан фикир сад тир: Мегьамедшериф Сулейманович вичин хиве авай везифайрив жавабдарвал гьисс авуналди эгечIзава, ада начагъбурун патахъай кьетIен къайгъударвал ийизва. Чун инанмиш хьайивал, тежрибалу хирургдиз больницадин кьиле авайбурун, медработникрин, гьакI агьалийрин патай еке гьуьрмет ава.

М. Гьасанбегов кьилин категориядин пешекар, Дагъустан Республикадин лайихлу духтур, республикадин здравоохраненидин министерстводин, райондин администрациядин ва ЦБ-дин кьиле авай ксарин патай ганвай гьуьрметдин грамотайрин, пишкешрин сагьиб я.

— Кефсуз яз, больницадиз гъайи ва я атай гьар са кас, сагъ хъхьана, кIвализ хъфин – им чун, духтурар, патал виридалай­ни чIехи шабагь я, — лугьузва Мегьамедшериф Сулеймановича.

Мадни малум хьайивал, Мегьамедшериф духтурдиз, рикI алай пешеди хьиз, гзаф мегьрибан дишегьли тир уьмуьрдин юлдаш Селминат Мегьамедрасуловнади ва бубадин рекьеваз физвай руш Зейнабани руьгьдин таъминвал, рикIин шадвал гузва.

Духтурдин хизандикай рахадайла, къейд ийиз кIанзава хьи, Селминат Мегьамедрасуловна вичи яргъал йисара медици­надин хиле, саки 30 йисуз райондин центральный больницадин кьилин духтурвиле кIвалах авур Мегьамедрасул Алагьвердиеван руш я. Ада райадминистрациядин патав гвай «МЦБ» МБУ-да кьилин бухгалтервиле кIвалахиз гзаф йисар я. Адазни коллективда, санлай районда еке гьуьрмет ава.

— Селминат вични духтурдин руш хьуни чун сад-садан гъавурда акьуниз, хизанда гьуьрмет артух хьуниз куьмекзава, — разивилелди  къейдзава М. Гьасанбегова.

Бубадал атай руш бахтлуди жеда, лугьузва бубайрин мисалда. Адан гьахълувал чаз Гьасанбеговрин хизанди мад сеферда тес­тикьар хъийизва. Мегьамедшериф Сулеймановичахъ ва Селминат Мегьамедрасулов­надихъ авай са велед Зейнаба, уьмуьрдин рехъ яз, бубадин пеше-духтурвал хкяна. ИкI,  2016-йисуз Кьасумхуьруьн 1-нум­радин юкь­ван школа къизилдин медаль къачу­­налди­ акьалтIарай Зейнаб Дагъустандин­ меди­ци­надин университетдик экечIна. Сиф­те­ курсунилай факультетдин старос­та­ хьайи З. Гьа­санбеговади, хъсандиз кIе­лу­ни­лай гъейри, ДГМУ-да фармокологиядай («Seientia est potential») тухвай университет­дин къенепа­тан, Грозный шегьерда нормаль­ный физио­логиядай вузрин арада тухвай олимпиа­дайра, Москвада инновацийриз куьмек­ гунин­ Фондуни «УМНИК» прог­раммадай тух­­вай «Мос­ковский молодежный­ старт — 2019» кон­курсда гъалибвилер къачуна. Мадни­, 2020-йисан 15-июндилай 21-июн­дал­ди­ («Тер­­ритория инновационных идей, техно­­ло­­гий и творческих решений» лишандик кваз) тухвай гатун Виридуьньядин илимдин марафонда Зейнаб Мегьамедшерифовнади­ кхьей ахтармишунрин проект («Разработк­а барьерных и биосовместимых нанопленок на хирургических сетках») конкурс­да 1-чкадиз лайихлу хьанай. Алай вахтунда­ Зейнаб Гьасанбеговади Склифосовскийдин­ тIва­ру­нихъ галай Москвадин НИИ-да «Общая хирургия» пешедай ординатурада кIел­за­ва.

Халкьдиз лап герек пеше хкянавай ва кIвалахзавай Мегьамедшериф ва Зейнаб Гьасановрихъ, гьуьрметлу и   хизандин къул хуьзвай Селминат Мегьамедрасуловнадихъ­ мадни агалкьунар, мягькем сагъламвал, рикIин динжвал хьун чи мурад я.

Хазран  Кьасумов