МВД-дин хроникадай
Дагъустандин МВД-дин пресс-къуллугъди хабар гузвайвал, Къизляр райондин уголовный розыскдин отделдин ва УЭБиПК-дин къуллугъчийри УФСБ-дин, Росгвардиядин управленидин «Горец» ОМОН-дин, Росрыболовстводин къуллугъчийрихъ галаз санал тади гьалда кьиле тухвай серенжемдин нетижада Малая Арашевка хуьруьн къерехда буькредин жинсинин балугъар муркIада тунвай морозильникар дуьздал акъудна. Малум хьайивал, къанунсуздаказ кьунвай буькре балугърин кьадар 2 тонндилай гзаф я.
Полициядин къуллугъчийри шак фенвай 66 йисан яшда авай агьали тайинарна ва ам отделдиз хкана. Чкадин агьалидин гафаралди, балугъар адан мукьва-кьилидинбур я.
И делилдай суд-силис авун патал материал кIватIнава. Силисчийрин вилик месэла акъвазнава: шак фенвайдаз яру ктабда гьатнавай балугъар гьинай атайди ятIа, гьа чешме тайинарун.
Шак фенвайдавай вахчур буькрейрин са чешне экспертиза авун патал ракъурнава.
«Лезги газет»
