22-апрелдиз Мегьарамдхуьруьн райондин Советский хуьруьн юкьван мектебда бине Ахцегь райондин Ялцугърин хуьряй тир муаллим, имам, шаир ва журналист Пашаев Агъаларбег (тахаллус — Сулейман) Энверович дидедиз хьайидалай инихъ 75 йис тамам хьуниз ва адан «Тарих дегишариз жедач» цIийи ктабдиз талукьарнавай межлис шад гьалара кьиле фена.
Ана Мегьарамдхуьруьн райондин кьилин заместитель Марта Абдуллаевади, райондин жемиятдин палатадин председатель Агъададаш Нагъметуллаева, Советский хуьруьн кьил Эмирагъа Асварова, Лезги писателрин союздин председатель Сардар Абила, «Куьредин ярар» эдебиятдин центрадин председатель Агьмедпаша Агьмедпашаева, «Лезги газетдин» векил яз и цIарарин авторди, «Вахтар ва инсанар» телеперадача кьиле тухузвай, шаир Владик Батманова, школадин директор Ренат Мегьамедгьуьсейнова, муаллимри, аялри ва хуьруьн жемятди иштиракна.
Сулейман Пашаева, гьеле мектебда кIелзавай йисарилай гатIунна, райондин «Коммунизм патал», республикадин «Лезги газет» газетриз, «Самур» ва аялар патал акъатзавай «Кард» журналриз макъалаяр, очеркар, шиирар ва гьикаяяр кхьизва. Ада араб, фарс чIаларалди кхьенвай Ялцугъ Эминан шиирар Аллагьверди Гьажиевахъ галаз цIарба-цIар таржума авуна, хуьруьнви Маил Эфендиевахъ галаз санал шииррин кIватIал, хайи хуьруьн тарихдиз талукь яз кIватIай материалдин бинедаллаз «Ялцугърин хуьр», гуьгъуьнлай «Пак фикирар» шииррин ва 2023-йисуз «Советский хуьруьн тарих» ктабар акъудна.
Алай йисуз ада эхиримжи йисара кхьей шииррин «Тарих дегишариз жедач» тIвар алай мад са ктаб чапдай акъуднава.
— Гзафбуруз Сулейман Пашаев хъсан муаллим, алакьунар авай шаир, диндин рекьяй чирвал авай имам хьиз чида. 53 йисуз ада акьалтзавай несилдиз чирвилер ва тербия гуз муаллимвиле зегьмет чIугуна. 35 йисуз ада имамвиле кIвалахна ва къени и кар давамарзава. 11 йисуз Сулейман муаллимди Мегьарамдхуьруьн райондин имамрин советдиз регьбервал гана.
Адан зегьметдин ва уьмуьрдин рекьяй чаз аквазвайвал, ам сабур авай, вичив истемишиз эгечIдай, гъиле кьур кар тамамдиз кьилиз акъуддай, бажарагъ авай, камаллу, къени инсан я, — къейдна вичин тебрикда Агъададаш Нагъметуллаева.
Марта Абдуллаевади юбилярдиз райондин кьил Фарид Агьмедован ва вичин патай шад межлис тебрик авуналди, адав «Мегьарамдхуьруьн райондин вилик лайихлувилерай» шабагь (гьуьрметдин знак) вахкана.
Гуьгъуьнлай рахай Къагьриман Ибрагьимова Сулейман Пашаева «Лезги газетдихъ» галаз хуьзвай алакъайрикай, адан эсеррин кьетIенвилерикай вичин фикирар лагьана ва «Лезги газетдин» кьилин редактор Мегьамед Ибрагьимован тапшуругъ кьилиз акъудуналди, юбилярдив «Лезги газет» — 100 йис» медаль вахкана.
Мярекатдал рахай Сардар Абила, Агьмедпаша Агьмедпашаева, Мегьамед Къужаева, Эмирагъа Асварова, Ренат Мегьамедгьуьсейнова С. Пашаева вичин уьмуьр лайихлудаказ, кьилел баркалла алаз акъудзавайди, уьмуьрдин рехъ метлебдив, яратмишунрин рехъ манадив ацIайди, къени халкьдин вилик акъвазна, акьулбалугъвилин имтигьан вахкузвайди, вичи тамамарай гьи кIвалах хьайитIани, халкьдин вилик уьзягъвилелди бажармишзавайди къейдна.
«Лезги газетдин» редакциядин коллективди Сулейман Энверовичаз юбилей рикIин сидкьидай мубаракзава ва адахъ чандин сагъвал, яргъи уьмуьр, мадни еке агалкьунар хьун алхишзава.
Къагьриман Ибрагьимов
