…Аял хьайи йикъалай дидедин гъилерал я жезвайди. КьепIинин кIане ацукьна дидеди я адаз лайлаяр язавайди. Аялдин таза пIузаррикайни сифтени-сифте хкатдайди «бах» гаф жедай. Пагь, шад жеда жегьил дидедиз, темен гуда баладиз, «чан бахдин!» лугьуз чан-рикI ийида адаз. Аялдин руьгьда гьатзавайди, адан ивидик акатзавайди дидедин нефес я.

Гьайиф хьи, гила абур масабур хьанва: «Мама, папа, да, нет, привет, хорошо­, пока…». Иллаки маса миллетрин арада­ шегьерда яшамиш жезвай хизанрин аялри и гафар кьезилдиз кьазва, абурулай чешне къачуз хуьрерин дидейрини гьакI вердишарзава чпин аялар. Шегьердин аялар викIегь тир хьиз, абурун гафар хъсанбур хьиз аквазва. Лезги хуьрера диде-бубаяр чебни хизанда урус чIалал рахазва. Аялдиз «афериндин» чкадал «агь, молодец» лугьузва. Аялдини абурун гьар са гаф кьазва, тикрар хъийизва.

Гьикьван хъсан жедай диде-бубайри аялрик хайи чIалал махар, мезелияр кIел­дай хесет кутазвайтIа. Чпини абурухъ галаз жуван чIалал кьве хъуьруьн-зарафат ийизвайтIа. Са мах ахъайзавайтIа, ашкъида гьатай аялди мад са мах ахъай хъувун тIалабдайвал. Гьа чIавуз хайи чIал аялдин эвез авачир гьевесдиз элкъведай.

Гьуьрметлу Майина Абдулмуталибовади «Лезги газетдин» 6-нумрадин 10-чина лап хъсан кхьенва хайи чIалакай. ТIа­лабун я амайбуруни адан макъала кIелун,  фагьумун. Сагърай Майина вах, ажеб жедай ам хьтин хайи чIалахъ рикI кузвай вахар, стхаяр чи арада гзаф хьанайтIа. Чун гъавурда акьун герек я эхир: дидед чIал эвелни-эвел я, вичиз эвез авачир, пак пай я тIебиатдин патай инсандиз къвезвай. Инсандиз гунагь я адан къадир тахьун.

Нурудин  Насруллаев,

РД-дин лайихлу муаллим