Инсаният гьикьван йисара аватIа, инсанри гьакьван вахтара дявеярни ийизва. Тарихда виридалайни зегьле ракъурдайди Дуьньядин кьвед лагьай дяве хьана. Чи уьлкведин 27 миллиондилай гзаф агьалияр телеф хьана. Душманди чукIурай кьван хуьрерикай, шегьеррикай, карханайрикай гьеле рахазвач. Дяведин цIай галукь тавур са кIвални авач.
Заз, литературадин муаллимдиз, М. А. Шолохован «Инсандин кьисмет», повестдин кьилин игит Соколован къаматди, адаз ватан кIан хьунин тегьерди еке таъсир авунай. Гьикьван четин, зегьле ракъурдай шартIара ам хьанатIани, азабрай, мусибатрай, имтигьанрай акъатнатIани, Соколован рикI ажугълу чIулав хьанач! Ам дяведай Инсан яз хтана. ВикIегь рухваяр, игитар халкьдихъ гзаф авайди гилани якъин жезва. Абурукай сад Къадиров Нариман Магьамедовичакай суьгьбетиз кIанзава. Ам, хурудал Афгъанистандин чилел къалурай кьегьалвиляй къазанмишай медаларни алаз, гьамиша хьиз, Малум тушир аскердин памятникдал къведа. Нариманан ими Гьажихан Ватандин ЧIехи дяведин иштиракчи тир. Нариманан гада Низами махсус серенжемда ава. Им Къадироврин 3 лагьай несилди Ватан душманрикай хуьзва лагьай чIал я.
Нариманаз Афгъанистанда хьайи женгерикай артух рахаз кIандач, амма дустарикай вичихъ галаз дяведа хьайи Х. Наврузовахъ, А. Агьмедовахъ галаз алакъаяр хуьзва. Дяведа Наримана викIегьвал къалурайди (ада саки 2 йисуз Баграмда къуллугъна) хурудал алай медалри субутзава.
Женгерин иштиракчи Нариман ЦIийихуьре яшамиш жезва. Ада еке академияр куьтягьнач. Ажугълу хьанач, садан кефини ханач, рикI тIарнач. Вичелай алакьдай куьмек виридаз къенин юкъузни гузва. Гьахьтин ачух рикI Худади адан уьмуьрдин юлдаш Лидадизни ганва. Гьамиша чинал хъвер алай ихьтин инсанрихъ галаз таниш хьайила, абур мадни акваз кIан жеда. Аяларни вич хьтинбур я, хтуларни са камунинни масанихъ фенвач лугьуз, хъуьрезва Нариман. Дугъриданни, Кемранни Низами диде-бубадал атанва. Заз абурун хизан чиз гзаф йисар я. Наримана мектебда авур «чIуру кIвалахарни», лутувилерни рикIел алама, зун адан классдин руководитель тир. Завай лугьуз жеда: 47 йисуз муаллимвилин кIвалахда заз гзаф акьуллу, камаллу ученикар (гила абур алимар, духтурар, инженерар, муаллимар я) хьанатIани, Нариманан хьтин рикI авайбур тIимил акуна.
Чпин веледриз Лидадини Наримана Ватан кIан хьун, хуьн пак тир буржи тирди чирна. Гьавиляй СВО-дин сифте йикъарилай Низамиди Украинада кьиле физвай махсус серенжемда иштиракна. Къалурай кьегьалвилерай сифтегьан «За боевые отличия» медаль Низамидиз гьеле 2022-йисан 28-июндиз гана. Гуьгъуьнлай, 2023-йисан 17-январдиз, Россиядин Президентдин Указдалди ам Жукован медалдиз лайихлу хьана. И шабагьри Низамидин викIегьвал, алакьунар къалурзава. Ада къуллугъзавай чкайрин тIварар кьадач. Кьилинди ам я хьи, чахъ Низами хьтин кьегьал рухваяр гзаф ава. Абур вири сагъ-саламат хьурай, гъалибвал гваз хтурай.
Чи халкьдин Гъалибвилин чIехи сувар за Ватан хуьзвай вирибуруз, адахъ рикI кузвайбуруз мубаракзава. Къе Украинада фашистрихъ галаз женг тухузвайбуруз къуй им эхиримжи дяве хьурай, вири дуьньяда ислягьвили агъавалрай!
Наби Набиев,
Мегьарамдхуьруьн райондин ЦIийихуьр
