Гитлеран Германиядин кьушунри 1941-йисан 22-июндиз хабарсуз Советрин Союздал вегьейла, шегьерар, хуьрер бомбайрив, танкарив барбатIдайла, ислягь инсанар къирмишдайла, уьлкведин вири халкьар, гьа гьисабдай Дагъустандин миллетарни Ватан душмандикай хуьз къарагъна. Гзафбуру ивияр экъичдай къизгъин женгера зурба кьегьалвилер, игитвилер къалурна. Фашистриз чилелни, ца­вани, вацIарани, гьуьлерални­ ри­кIелай тефидай ягъунар кьуна.

1945-йисан 9-майдиз Яру Армияди Гитлеран Германиядал гъа­либвал къазанмишна. И ЧIехи Гъалибвилик лезги халкьдин рухвайрини рушари еке пай кутуна. Чи халкьдин вад кьегьал хва Советрин Союздин Игит лагьай тIварцIиз лайихлу хьана. Гзафбурун игитвилер орденралди, медалралди къейдна.

Гьайифдин кар ам я хьи, фашис­трихъ галаз кьиле фейи женгера жуьрэтлувал, дирибашвал къалурай, душмандин аскерар, техника терг авур, гьар са операция гъалибвилелди куьтягьуник­ чпин лайихлу пай кутур ва командованиди Совет­рин Союздин Игитвилин тIвар гун патал къалу­рай чи викIегь вири рухвайрив Игитвилин гъед агакьнач.

Къе, Гъалибвилин 79-йис къейддайла, чна абур рикIел хкун лазим я.

И жуьредин гьахъсузвал арадай акъудун патал за 2015-йисуз уьлкведин оборонадин министерстводиз, Президентдиз чарар кхьенай. Гьелелиг арадал атанвай нетижа авач.

Чаз чи кьегьал рухваяр чир хьана кIанда. Ингье абур:

Къулиев Якьуб Къулиевич — ге­нерал-майор, атлуйрин кьушунрин начальник. Ам 1942-йисан 21-ноябрдиз фельдмаршал Манш­тейнан кьушунрихъ галаз кьиле фейи къизгъин женгера телеф хьана.

Абилов Магьмуд Абдулризаевич — генерал-майор. 1945-йисан 20-апрелдиз, Яру Армиядин кьушунри Берлиндал гьужум тешкилзавай чIавуз, гзаф женгера вичин гъилик квай частар гъалибвилихъ тухунай Игитвилин тIвар гун патал къалурнай.

Набиев Мустафа Агъаевич — подполковник, немсеринни фашис­трин чапхунчийриз акси яз тешкилай гьунарлу гьужумрай, операцийрай 1945-йисан февралдиз­ Совет­рин Союздин Игитвилин тIвар гун патал къалурнай.

Заманов Хийирбег Демирбегович — полковник. Ада Орел, Воронеж, Конотоп, Нежин, Киев, Львов, Краков, Дембиц ва маса шегьерар азад авунин женгера иштиракна. Ам Ленинан, Яру Пайдахдин кьуд, Яру Гъетрен, Ватандин дяведин 1-дережадин, Суворован, Александр Нев­скийдин орденрин сагьиб тир.

Назаралиев Абдуселим Алиевич — подполковник, дивизиядин комиссар, викIегь дагъви. Крым, Херсонес душмандикай хуьдай чIавуз Назаралиева дивизиядин командирдин везифаяр вичин хивез къачуна ва, хер хьанвайтIани,  эхирдалди вичин аскеррихъ галаз санал женг чIугуна.

Игитриз баркалла!

Икрам Ягьяев,

зегьметдин ветеран, МВД-дин майор