И йикъара чав къайи хабар агакьна: 68 йисан яшда аваз, лезгийрин машгьур манидар, РД-дин культурадин лайихлу къуллугъчи Даниял Бедрединович Къазиев рагьметдиз фена.
Д.Б.Къазиев 1956-йисан 25-февралдиз дидедиз хьана. Гьеле аял чIавалай адан манияр лугьунал рикI алай. Юкьван мектеб акьалтIарайдалай кьулухъ Германияда Советрин Армиядин жергейра къуллугъна. Ленинграддин гимияр туькIуьрдай институт акьалтIарайдалай кьулухъ са заводда инженер яз кIвалахна.
Гуьгъуьнлай Даниял Къазиева вичин уьмуьр медениятдихъ галаз алакъалу авуна. Краснодардин культурадин институт акьалтIарайдалай кьулухъ ада, Дагъустанда сифтебурукай яз, «Шад рикIер», «Аран» ВИА-яр арадал гъана, абуруз регьбервал гана.
Даниял Бедрединович, хъсан манидар хьиз, кар алакьдай тешкилатчини тир. Адан регьбервилик кваз Дербентда арадал гъайи халкьдин алатрин оркестр са куьруь гъвечIи девирда халкьдин арада машгьур хьанай. Хъсандиз музыкадин гъавурда авай пешекардилай алакьунар авай устадар санал кIватIиз ва хъсан ансамбль арадал гъиз алакьнай.
Къейд ийин хьи, Д.Къазиева са шумуд йисуз Лезги театрдани кIвалахна, милли сегьнедал са шумуд къаматдал чан гъана. Яргъал йисара республикадин медениятдин хиле зегьмет чIугунай ам «Дагъустан Республикадин культурадин лайихлу къуллугъчи» тIварцIиз лайихлу хьанай.
Эхиримжи йисара Д.Къазиева Дербент райондин ЛукIварин хуьруьн медениятдин макандиз регьбервал гузвай.
«Лезги газетдин» редакциядин коллективди Даниял Бедрединович Къазиев рагьметдиз финихъ галаз алакъалу яз, адан хизанриз, вири багърийриз, дериндай хажалат чIугунивди, башсагъулгъвал гузва. Адан экуь къамат чи рикIера амукьда.
