Диде — Ватан кьур вахтар цIу
Алатзавач рикIелай зи.
Гъамарин къат, гьижран яцIу
Алатзавач рикIелай зи.
А цIун хура акъвазайбур
Алатзавач рикIелай зи.
Дигедиз чан акIажайбур
Алатзавач рикIелай зи.
ГьикI алатрай чи рикIерилай Ватандин ЧIехи дяведа чи халкьдиз акур азиятар, авахьай вилин накъвар, лагерра пуч хьайи ватанэгьлияр, умудсуз рекьера гьатай етимар, гъуьлер кьейи хендедаяр, рухваяр пуч хьайи дидеяр! Мегер чи рухвайрини рушари а вахтунда къалурай гьич ван тахьай хьтин игитвилер рикIелай алатдани? Чаз абурун къаматар чи вацIарин лепейрай, дагъларин сефил чинрай, гьуьлерин гъамлу дуьзенрай, чуьллерин гегьеншрай ва эхирни чи руьгьерин деринрай къени аквазва, вучиз лагьайтIа игит инсанрин гьунарлу гьар са кам абурун рухвайрин, хтулрин, птулрин — несилрин бейнийра яшамиш жезва. Абур, гимишдинни къизилдин къаябар хьана, тарихда гьатнава.
Тарих мидаим я. Игит тарихдалди чна несилар тербияламишзава, Ватандиз, вири обществодиз санлай вафалувилин гьисс кваз. Бязи четинвилерал расалмиш жезватIани, чи гьар йикъан тербиядин кIвалах бада физвач. Эгер акI туширтIа, низ чида, чаз ни ва мус кьуьл ганвайтIа. 1999-йисан вакъиаяр рикIел хкун бес я.
Эхь, 1999-йисан зул дагъустанвийрик мад сеферда къурху кутурди хьана. Ватандин ЧIехи дяведилай гуьгъуьниз акьван чIавалди Дагъларин уьлкведал зегьерлу хушракан куьрс хьанвачир. Ам тергун патал кьетIи къаст, тупламиш хьанвай халкь, гьакъикъатдин гъавурда твадай таблигъатчияр ва женгинин командирар лазим тир. Абур жагъурун герекни атанач. Вири чкайрал алай: кьиле генерал-майор авай офицеррин состав, республикадин жемят. “Лезги газетдилай”, чи республикадин СМИ-рилай, Дагъустандин агьалияр тупламишиз ва гъавурда тваз алакьна. Республикадин гьар са пипIе тухвай ихьтин кIвалахдин нетижа Хаттабанни Басаеван чапхунчи кIеретIри гуьзлемиш тавурди хьана. Душмандин вилик, тупламиш хьана, гьулдандин туруниз элкъвенвай халкь къалхан хьана акъвазна.
Абдул Ашурагъаев
