Кьиблепатан Дагъустандин меркез Дербентда шегьердин 2000 йисахъ галаз алакъалу яз планламишнавай аваданламишунин кIвалахар давам жезва. И барадай кар алайбурукай ва шегьер патал гзаф важиблубурукай сад Хандадаш Тагъиеван куьчедилай гатIунна “Дагюгстрой” ОАО-дин дараматдин мукьувай гьуьлуьн къерехдин са пай тирвал фенвай “Кавказ” шегьредал, Дербент райондин Сабнава хуьруьн къекъуьндал кьван тухузвай путепровод я.
Ракьун рекьин винелай фидай адан яргъивили 2,5 километр тешкилда. Алай вахтунда эцигунрин кIвалахар йигин еришралди кьиле тухузвай и объект кардик акатайла, къадим шегьердин агьалийрин яшайишдин шартIар хейлин хъсан жеда. ГьикI хьи, шегьердин центральный паюна автотранспортдин гьерекат хейлин къулай, шегьерда экологиядин шар-тIарни хъсан жеда.
Технический жигьетдай 3-категориядинди тир и путепроводдик Самур-Дербент къаналдал эцигдай ва вичин яргъивал 24,5 метр жедай цIийи муьгъни акатзава.
* * *
Шегьерда агьалийриз яшайишдин къулай шартIар яратмишунин муниципальный программа тамамарунни давам жезва. Адан сергьятра аваз шегьердин гзаф мертебайрин кIвалерин гьаятар, рекьер, тротуарар ва паркар аваданламишун лазим я.
Къейдна кIанда хьи, аваданламишунин кIвалахрал гуьзчивалдай комиссияди шегьердин агьалийрин меслятарни фикирда кьазва. Са кьадар кIвалахар гьеле кьилизни акъуднава ва давамни жезва.
Махсус комиссиядин и мукьвара кьиле фейи заседанидал, агьалийри меслят къалуруналди, кIвалахрин пландик Абас Исрафилован тIварунихъ галай парк, ракьун рекьин вокзалдин сквер, Пугинан ва Красноармейский куьчеярни кухтунин къарар кьабулнава.
Нариман Къарибов
