ЦIийи ктабар

Мукьвара Кьасумхуьрел, «Новый Кавказ» — «Кюринские зо­ри» чапханада, лезгийрин маш­гьур гьикаятчи, шаир, хейлин­ йисара СтIал Сулейманан райондин Шихидхуьруьн мек­тебда муаллим яз кIвалахай Нажмудин Шихнабиеван «Ша­ирдин рикI» тIвар алай цIийи ктабдиз экв акуна.

Къейд ийин хьи, Н.Шихна­биев лезги кIелзавайдаз икьван чIавалди гзафни-гзаф гьикаятчи яз чидай. Шиирар авторди фадлай кхьизвайтIани, абур печатдиз кьериз-цIаруз акъатзавай. Виликдай акъатнавай адан саки вири ктабарни («Куьредин билбил», «Мехъер», «Уьмуьрдин декьикьаяр» ва масабур) гьикаятдин эсеррикай ибарат я.

«Шаирдин рикI» ктабди Н.Ших­­набиевахъ шиирар кхьинин рекьяйни бажарагъ авайди субутна. ЦIийи ктабда гьатна­вай ватанпересвилин, муьгьуьббатдин, тербиядин темайрай, тIебиатдикай, инсанрин къи­лихрикай кхьенвай шиирри кIелзавайбурун фикир желбзава, абура къарагъарнавай мес­элайрин гьакъиндай веревирдер ийиз тазва.

Чна Нажмудин муаллимдиз цIийи ктаб мубаракзава ва адахъ яратмишунрин рекье цIийи кукIушар муьтIуьгъардай илгьамни руьгьдин къуватар хьун алхишзава.

Чи  мухбир