Куь ихтиярар

Яшамиш хьунин агъа кIанин кьадардилай тIимил къазанжи къвезвай хизанар тIимил эменни авай хизанар яз гьисабзава. И дуьшуьшда регионда тайинарнавай къайдайрал амалзава.

Кьилди къачуртIа, къазанжийрин кьадар чирдайла, хизанри къачузвай мажибар, стипендияр, пособияр, пенсияр, киридин гьакъияр, къиметлу чарарин дивидендар, алиментар, авторвилин ихтияррай къачузвай пишкешар фикирда кьазва.

Гьахъ-гьисаб эхиримжи пуд вацран муддатдиз талукь вири къазанжийрай кьи­лиз акъудзава.

Къейд ийин, са нефесдиз талукь яшамиш хьунин агъа кIанин кьадар алай вахтунда чи республикада 14062 манат я.

Агьвал тIимил авай хизандин дережа МФЦ-дин идарадай къачуз жеда.  Ихьтин документар истемишзава:

 диде-бубадин паспортар;

 аялар хайивилин гьакъиндай шагьадатнамаяр;

 эвленмиш хьунин гьакъиндай шагьадатнама;

 эхиримжи пуд вацран къазанжийрин гьакъиндай справка;

 зегьметдин дафтар;

 хизандин составдин гьакъиндай декларация.

«Лезги газет»