Районрин ва шегьеррин кьилерин кIвалахдиз гила муниципалитетриз желб авур инвестицийрин кьадардиз килигна къимет гуда. Муниципальный тешкилатрин регьберрин кIвалахдиз ихьтин жуьредин къимет гунин теклиф 23-апрелдиз Дагъустандин Гьукуматдин Председатель Абдулмуслим Абдулмуслимован регьбервилик кваз кьиле фейи оперативный штабдин заседанидал РД-дин карчивилин ва инвестицийрин рекьяй агентстводин регьбер Гьуьсейн Гьуьсейнова гана.
Абдулмуслим Абдулмуслимова и теклифдин тереф хвена ва ам РД-дин Кьилин ва Гьукуматдин Администрациядив агакьардайдакай лагьана.
«РД-дин муниципальный тешкилатрин кьилерин ва инвестицийрин векилдин (уполномоченный) кIвалахдин менфятлувилин кар алай уьлчме тайинарунин гьакъиндай» типовой проектдин къарар гьазурнава.
Теклифзавайвал, адак кьуд нетижа кутазва: пуд йисан вахтунда муниципалитетдин тешкилатдин мулкуна уьмуьрдиз кечирмишнавай инвестицийриз талукь проектрин кьадар; гъилевай йисуз муниципалитетрин тешкилатрин мулкуна уьмуьрдиз кечирмишнавай ва пландик кутазвай инвестицийрин проектрин кьадар; пуд йисан вахтунда, алатай йисав гекъигайла, муниципалитетрин тешкилатрин мулкара инвестицийрин проектар уьмуьрдиз кечирмишун патал чара авур инвестицийрин кьадар; зонадин классификация гьисаба кьуналди, муниципалитетрин тешкилатра йисан вахтунда желб авур бюджетдинбур тушир инвестицийрин кьадар.
Къейд авун лазим я хьи, заседанидин сергьятра аваз маса месэлайризни килигна: Дагъустан Республикадин государстводин гьукумдин ва чкадин самоуправленидин органри агьалийрин арзайриз жаваб гузвай гьалдиз; умуми образованидин идарайра информациядин технологияр яратмишуниз; Дагъустан Республикада муниципальный стандартар яратмишуниз; Дагъустан Республикада зирзибилдиз талукь гьалдиз.
Хийир Эмиров
