21-апрелдиз Ахцегь райондин кьил Абдул-Керим Палчаев Чеперин хуьруьз мугьман хьанвай. Ина ам Ватандин ЧIехи дяведа телеф хьайибурун гьуьрметдай эцигнавай гуьмбет цIийикIа туькIуьр хъийизвай гьалдихъ галаз таниш хьана, хуьруьн мектебдиз фена, чкадин жемятдихъ авай месэлайриз фикир гана.
Лезги халкьдин меденият, бубайрилай агакьнавай милли адетар хуьнин мураддалди, Абдул-Керим Палчаева виликдай гьар йисуз Чеперин хуьре тухвай Цуькверин сувар арадиз хкунин месэлани веревирдна.
«Милли суварри гьар са халкьдин къанажагъ гьихьтинди ятIа къалурзава. Гьар йисан майдин вацра тешкилзавай Цуькверин сувар гзафбурун рикIел алама. Ана неинки са чкадин хуьрерин, гьакIни маса районрин векилрини иштиракзавай. Им чи халкьдин рикI алай суварикай сад тир ва ам чна арадал хкида», — лагьана А.-К.Палчаева.
ЦIи майдин вацран эхирра Чеперин хуьре, икьван йисар алатайла, мад сеферда Цуькверин сувар кьиле тухудай къарар кьабулнава.
«Лезги газет»
