Са шумуд югъ идалай вилик Санкт-Петербургда панкратиондай Россиядин кIвенкIвечивал патал акъажунар кьиле фена.
Ана тренер Артур Мегьамедован гъилик вердишвилер къачузвай чи ватанэгьлийри — Амир Бабаева (71 кг) — Россиядин кIвенкIвечивилин тIвар (гила ада 2-сеферда къазанмишнава), Арсен Сулейманова (84 кг) — къизилдин, Исамудин Агьмедова (93 кг) буьруьнждин медалар къазанмишна.
А.Бабаева ва А.Сулейманова мукьвара кьиле фидай дуьньядин чемпионатдиз гьазурвал аквада.
***
И йикъара Краснодардин крайдин Ленинградская станицада Кьиблепатан ва Кеферпатан федеральный округрин путар хкажунай викIегь спортсменрин арада акъажунар кьиле фена. Ана 300-дав агакьна спортсменри, гьам итимри, гьамни дишегьлийри чпин устадвал къалурна.
РД-дин путар хкажунай спортдин федерациядин президент Магелан Саидован регьбервилик кваз и акъажунра иштиракай жегьилрин команда (абуру «Белиджи» ва «Парус» спортшколайра устадвал хкажзава) буьруьнждин медалдиз лайихлу хьана. Кьилди къачуртIа, акъажунра Гьетем Мамедова (78 кг), Эдик Агьмедова (85 кг), Ислам Агъабегова (95 кг), Рустам Мегьамедмирзоева (95 кг-дилай виниз) — гимишдин ва Азим Абакарова буьруьнждин медалар къазанмишна.
Къейд авун лазим я хьи, эстафетада Дагъустандин командади, аник Ислам ва Рустам Агъабеговар, Эдик Агьмедов ва Азим Абакаров квай, 3-чка кьуна.
***
Алатай гьафтеда Ханты-Мансийскдин автономный округдин Нижневартовск шегьерда РФ-дин 10-далай виниз субъектрай, гьа гьисабдай яз ХМАО-дай, ЯНАО-дай, Тюмендин, Челябинскдин, Кургандин, Свердловскдин, Томскдин, Туладин областрай, Башкортостан Республикадай ва Пермдин крайдай тир спортсменрин иштираквал аваз Россиядин лайихлу тренер П. Литвиенкодин экуь къаматдиз бахшна 17 йисал къведалди яшара авай жегьилрин арада самбодай Вирироссиядин турнир кьиле фена.
Ана саки 200-дав агакьна жегьил гадайри заланвилин — 9 ва рушари заланвилин 5 категориядай чпин устадвал къалурна. Акъажунар гзаф итижлудаказ ва къизгъиндаказ кьиле фена.
Турнирда вичин ери-бине Кьурагь райондин Штулай тир, алай вахтунда Радужный шегьерда яшамиш жезвай Амир Зугьрабова (58 кг) 1-чка кьуна. 2009-йисуз дидедиз хьанвай чи ватанэгьлиди тренер Г.Бабаеван гъилик устадвал хкажзава. А.Зугьрабов округдин, Вирироссиядин мад са шумуд турнирдин гъалибчи ва призер я.
Рагнеда Рамалданова
