Чи ватанэгьлияр — гьар сана
Шалбуз дагъдинни Яру дагъдин этегрив экIя хьанвай Текийрин хуьр гуьрчег тIебиатдалди, гъвечIиди ятIани, тIвар-ван авай инсанралди девлетлу я. Ам къуншидаллай Миграгърин администрациядик акатзава. Текийрин хуьряй акъатай ксари къе чи республикада, адалай къецени регьбервал гудай ва жавабдар маса къуллугъар кьилиз акъудзава.
И мукьвара зун таниш хьайи Герей Эмирсултанович Алимурадовни баркаллу текивийрикай сад я. Такабурлу дагъларин къужахда авай мулкара чIехи хьайи ватанэгьли алай вахтунда «Кавэлектромонтаж» тешкилатдин Ставрополь шегьерда авай филиалдин генеральный директор я.
Ихьтин дережадив ам зегьметдал рикI хьуни, везифаяр пешекарвилелди кьилиз акъудуни агакьарна. Ада Ставрополда жуьреба-жуьре йисара са шумуд къуллугъ кьилиз акъудна.
Герей Алимурадов 1962-йисан 2-сентябрдиз Докъузпара райондин Текийрин хуьре дидедиз хьана. Дяве куьтягь хьайидалай кьулухъ са шумуд йис алатнавайтIани, Герей дуьньядал атай девирда инсанриз четинвилер акун гьеле давам жезмай.
«Зи буба дяведин иштиракчи тир. Ам фронтдай са гъил галамачиз хтанай. Чаз четинвилер тIимил акунач. Хизан чIехиди тир — ирид кас авай. 1980-йисуз за Миграгърин мектеб куьтягьна. Гуьгъуьнлай зун Украинада механиквилин пеше къачуз, техникумдик экечIна», — ихтилатна Г.Алимурадова.
1981-1983-йисара армияда къуллугъна. Гуьгъуьнлай техникум акьалтIар хъувуна. 1986-йисуз ам Ставрополдин са колхоздиз рекье туна. Йисни зура и колхозда зегьмет чIугуна. Гуьгъуьнлай Ставрополда «Кавэлектромонтаж» карханада сифте шофер яз, ахпа механик, гараждин чIехиди яз кIвалахна.
1993-1999-йисара Ставрополдин государстводин технуниверситетда кIелна, кьилин образование къачуна. 2009-йисуз «Кавэлектромонтаждин» Ставрополда авай филиалдин директорвиле тайинарна. Регьбервал гудай къуллугъдал жавабдарвални ихтибарлувал къалурай дагъвидиз мад чIехи къуллугъ — генеральный директорвал — теклифна. Герей Эмирсултановичахъ алай вахтунда кIвалахдин 38 йисан тежриба ава.
Къейд ийиз кIанзава хьи, «Кавэлектромонтаж» Советрин девирдилай кардик квай чIехи кархана я. Ам асул гьисабдай энергетикадихъ, электромонтаждихъ, яшайишдин кIвалер ва алишверишдинни санайидин объектар энергиядалди таъминарунихъ галаз алакъалу кIвалахрал машгъул я. Ибурулайни гъейри, «Электромонтаж» ООО эцигунрин умуми кIвалахрални машгъул жезва.
Ставрополда авай лезгийрикай, ватанэгьлийрин алакъайрикай суьгьбет ая лагьайла, Герей Алимурадова заз ана вишелайни гзаф ксарикай ибарат тир чпин кIватIал арадал гъанвайдакай ихтилатна. Куьмек герек атайбуруз куьмек гузва, датIана сад-садахъ галаз алакъада жезва.
Г.Алимурадовахъ кьве хва ава: сад вичин хизанни галаз Москвада яшамиш жезва, муькуьди — диде-бубадихъ галаз Ставрополда.
Ватанэгьли мукьвал-мукьвал хайи хуьруьзни хъфизва.
Гьар сана авай ватанэгьлийрикай чав агакьдай хабарар къуй анжах шадвал кутадайбур хьурай!
К.Ферзалиев
