Владик Мисриханов Донбассда кьиле тухузвай дяведин махсус серенжемда игитвилелди телеф хьана. Ам Махачкъала шегьерда дидедиз хьана. Адан диде-буба Сабина ва Мегьрали Мисрихановрин ери-бине СтIал Сулейманан райондай я, абурун хизан фадлай Махачкъалада яшамиш жезва.
Махачкъаладин 16-нумрадин юкьван школада кIелдай йисара Владик ахлакьдин, общественный уьмуьрда иштиракунин рекьерай чешне тир, спортдални рикIивай машгъул жезвай. 2016-йисуз ада Махачкъала шегьердин кIвенкIвечивал патал армспортдай тухвай акъажунра 3-чка кьунай.
Владик Мисриханова 9-класс акьалтIарна. Гуьгъуьнлай Дагъустандин политехнический колледжда «Бурение нефтяных газовых скважин» рекьяй пешекарвал къачуна.
2021-йисуз В.Мисрихановаз армиядин жергейриз эвер гана. Ада Москвадин областдин Нахабино поселокда инженервилин кьушунра къуллугъзавай. Уьтквем лезги хци икьрар кутIунна, армияда къуллугъ авун давамарна. Махсус серенжем башламиш хьайи сифте йикъарилай ада вичин буржи СВО-дин зонада давамарна. 2022-йисан 20-октябрдиз кьегьал хва Владик Мегьралиевич игитвилелди телеф хьана. Адан анжах 21 йисни 7 варз тир. 30-ноябрдиз ам СтIал Сулейманан райондин ДаркIуш-Къазмайрин сурара кучукна. Рагьмет хьурай вичиз.
Чагъинда авай хва къакъатай Сабина ва Мегьрали Мисрихановрин рикIерикай чаз хабар я. Абурун залан дерт чнани гьиссзава. Лугьуда хьи, викIегьвал халис итимриз хас я. Ватандиз четинзавайла, кьегьал хва Владикавай душмандин хуруз тефена акъвазиз хьанач. СВО-дин вири иштиракчияр игитар я!
2023-йисан 3-мартдиз Россиядин Федерациядин Президентдин Указдалди Мисриханов Владик Мегьралиевичан кьегьалвал «Жуьрэтлувиляй» ордендалди къейдна. Шабагь райондин кьил Саид Темирханова рагьметлудан буба Мегьрали Мисрихановав вахкана.
Владик Мисриханован тIвар эбеди авун яз, школада мемориалдин кьул ачухна.
Владикан уьмуьр лап куьруьди хьана. Экв гана, фад туьхвей гъетрен хьиз. Владик Мисриханован, гьакI Ватан патал чанар къурбанд авур маса рухвайрин тIварарни райондин, уьлкведин тарихда амукьда, несилри абур рикIера хуьда.
Хазран Кьасумов
